TIRANË ,21 qershor 2026/Albania Express News/Ish-ministri socialist dhe ish-deputeti i Partisë Socialiste, Ditmir Bushati, ka publikuar një reagim të fortë në rrjetet sociale, ku shpreh mbështetjen për qytetarët e pakënaqur me situatën në vend dhe bën thirrje për reflektim të thellë politik e shoqëror.
Në postimin e tij, Bushati thekson se qytetarët që po ngrejnë zërin nuk janë të nxitur nga faktorë të jashtëm dhe as të manipuluar, por shqiptarë të revoltuar nga mënyra se si, sipas tij, po trajtohet vendi. Ai nënvizon se këta qytetarë janë të vetëdijshëm për pasojat e asaj që e cilëson si aleancë e dëmshme mes politikës, oligarkisë, medias dhe krimit të organizuar.
Sipas Bushatit, shqiptarët kërkojnë më shumë drejtësi, më shumë dinjitet, më shumë shpresë dhe më shumë mundësi për të gjithë, duke argumentuar se vendi ka nevojë për një qasje të re në qeverisje dhe zhvillim.
Në mesazhin e tij, ish-ministri shprehet se çdo ditë që kalon forcon bindjen se “Shqipëria e Re” nuk është thjesht një aspiratë, por një kapitull i pashmangshëm që duhet përqafuar. Ai e konsideron këtë periudhë si një moment që kërkon urtësi, përgjegjësi dhe reflektim të thellë nga të gjithë aktorët politikë dhe shoqërorë.
Postimi i Bushatit vjen në një kohë debatesh dhe tensionesh të shtuara në jetën politike të vendit, ndërsa mesazhi i tij është shoqëruar me sloganin #ShqipëriaMeritonMëShumë, duke përcjellë idenë se qytetarët presin ndryshime konkrete dhe një standard më të lartë të qeverisjes.
