ELBASAN ,19 qershor 2026/Albania Express News/Tensionet mes banorëve të fshatit Kryezjarr, në Bashkinë e Elbasanit, dhe kompanisë që ka ndërtuar nënstacionin elektrik në zonë janë rikthyer sërish në qendër të vëmendjes. Dhjetëra banorë dolën sot në protestë, duke bllokuar hyrjen kryesore të nënstacionit dhe duke kërkuar rehabilitimin e plotë të infrastrukturës rrugore, e cila sipas tyre është dëmtuar rëndë nga qarkullimi i mjeteve të tonazhit të rëndë gjatë viteve të fundit.
Banorët shprehen se ndërtimi i nënstacionit elektrik nisi rreth tre vite më parë dhe se në atë kohë ata pranuan të bashkëpunonin me kompaninë zbatuese, duke lejuar përdorimin e rrugëve të fshatit për transportin e materialeve dhe makinerive të nevojshme për realizimin e projektit. Në këmbim, sipas tyre, ishte premtuar investim në infrastrukturën lokale dhe përmirësimi i rrugëve që përdoren çdo ditë nga komuniteti.
Megjithatë, tre vite pas nisjes së punimeve dhe tashmë që nënstacioni është drejt përfundimit të plotë të aktivitetit të tij ndërtimor, banorët thonë se premtimet nuk janë mbajtur. Përkundrazi, rrugët janë dëmtuar ndjeshëm, duke krijuar vështirësi të mëdha për lëvizjen e automjeteve, fermerëve dhe banorëve të zonës.
Me pankarta në duar dhe thirrje për zgjidhjen e problemit, protestuesit bllokuan hyrjen drejt nënstacionit, duke kërkuar ndërhyrje të menjëhershme dhe rikonstruksion të plotë të segmentit rrugor. Ata deklaruan se gjendja aktuale e rrugës ka vështirësuar jetën e përditshme të komunitetit dhe ka prekur drejtpërdrejt rreth 200 familje që banojnë në këtë zonë.
Sipas tyre, pjesa më e madhe e banorëve janë të moshuar, të cilët përballen çdo ditë me vështirësi në lëvizje për shkak të amortizimit të rrugës. Ata theksuan se kërkesa e tyre është e qartë: rikthimi i rrugës në gjendjen që kishte para nisjes së punimeve dhe jo zgjidhje të përkohshme.
Banorët paralajmëruan se nëse institucionet dhe kompania nuk marrin masa konkrete, protestat do të përshkallëzohen. Ata deklaruan se janë të gatshëm të bllokojnë plotësisht rrugën e fshatit dhe të mos lejojnë hyrjen e asnjë mjeti që i shërben nënstacionit elektrik, duke pezulluar kështu funksionimin normal të aktivitetit në zonë.
Pak minuta pas nisjes së protestës, në vendngjarje mbërriti kryetari i Bashkisë së Elbasanit, Gledian Llatja, i cili zhvilloi një takim me një përfaqësi të banorëve, si dhe me përfaqësuesit e kompanisë dhe nënkontraktorët që po zbatojnë projektin.
Takimi u zhvillua me qëllim gjetjen e një zgjidhjeje për situatën e krijuar dhe shmangien e përshkallëzimit të protestës. Në përfundim të bisedimeve, banorëve iu komunikua se kompania ishte e gatshme të ndërhynte vetëm për arnimin e rrugës së dëmtuar.
Por kjo ofertë nuk u prit pozitivisht nga protestuesit, të cilët e konsideruan një zgjidhje të pamjaftueshme për problemin. Ata deklaruan se nuk do të pranojnë ndërhyrje sipërfaqësore dhe se do të vazhdojnë të kërkojnë rikonstruksionin e plotë të rrugës, në mënyrë që ajo të rikthehet në gjendjen që kishte para nisjes së punimeve për ndërtimin e nënstacionit.
Banorët e Kryezjarrit shprehen të vendosur për të vijuar reagimin e tyre qytetar deri në realizimin e kërkesave, ndërsa presin që institucionet përgjegjëse dhe kompania zbatuese të japin një zgjidhje konkrete dhe afatgjatë për një problem që, sipas tyre, zvarritet prej tre vitesh.