KORÇË,20 maj 2026/Albania Express News/Gazetari Xhensil Shkembi ka përcjellë një mesazh prekës dhe të fortë në rrjetet sociale, duke ngritur alarmin për gjendjen e rëndë të familjeve shqiptare që përballen me sëmundjet e fëmijëve dhe pamundësinë ekonomike për t’i kuruar ata.
Në postimin e tij në Facebook, ai ka bërë thirrje urgjente për ndihmë për një vajzë të vogël nga Voskopi i Korçës, gjendja shëndetësore e së cilës paraqitet kritike. Gazetari u ka kërkuar qytetarëve që të kontribuojnë sipas mundësive, duke publikuar edhe të dhënat për ndihmë financiare, në mënyrë që familja të përballojë trajtimin e vajzës.
Por përtej thirrjes humanitare, Shkëmbi ka ndarë edhe një reflektim të thellë mbi realitetin e dhimbshëm që po përjetojnë shumë prindër shqiptarë. Ai shprehet se prej ditësh merr vazhdimisht mesazhe nga familje të shkatërruara ekonomikisht, shpirtërisht dhe psikologjikisht, të cilat kërkojnë ndihmë për fëmijët e tyre të sëmurë.
Sipas tij, dhimbja më e madhe për një prind është të shohë fëmijën e sëmurë dhe të mos ketë mundësi për ta shpëtuar. Edhe pse vetë nuk është prind, gazetari thekson se për shkak të profesionit ka qenë çdo ditë pranë njerëzve në nevojë dhe ka kuptuar peshën e jashtëzakonshme të këtyre dramave njerëzore.
Në reagimin e tij, ai kritikon edhe mungesën e përgjegjësisë institucionale, duke theksuar se nuk duhet të jetë vetëm qytetari ai që kërkon “lëmoshë” apo organizon fushata bamirësie për të shpëtuar jetën e një fëmije. Shkëmbi ngre pyetjen se përse shteti nuk arrin të garantojë trajtimin e këtyre rasteve brenda vendit, apo të financojë kurimin jashtë Shqipërisë kur është e nevojshme.
Ai sjell në vëmendje faktin se miliona euro mblidhen çdo vit përmes platformave bamirëse dhe organizatave humanitare, ndërsa familjet vazhdojnë të trokasin derë më derë për ndihmë. Gazetari e përshkruan këtë situatë si tepër të lodhshme emocionalisht dhe psikologjikisht, duke pranuar se ndihet i pafuqishëm përballë rasteve të shumta që i kërkojnë ndihmë çdo ditë.
Megjithatë, në fund të mesazhit të tij, ai vlerëson solidaritetin e shqiptarëve, duke i cilësuar si njerëz humanë dhe të ndjeshëm ndaj dhimbjes së tjetrit. Sipas tij, vuajtjet dhe vështirësitë që ka kaluar populli shqiptar ndër vite kanë bërë që qytetarët të jenë gjithmonë pranë njëri-tjetrit në momentet më të vështira.
Gazetari e mbyll reagimin me një apel të drejtpërdrejtë për të ndihmuar vajzën e vogël nga Korça, duke u bërë thirrje të gjithë qytetarëve që të kontribuojnë sado pak për t’i dhënë një shans jetës së saj.