LIBRAZHD ,10 qershor 2026/Albania Express News/Kryetari i Bashkisë së Librazhdit, Mariglen Disha, zhvilloi një takim me kryetarët e fshatrave dhe administratorët e njësive administrative, në kuadër të masave për parandalimin dhe menaxhimin e zjarreve gjatë sezonit veror Qershor–Shtator 2026.
Gjatë takimit u diskutuan në mënyrë të detajuar masat parandaluese, forcimi i koordinimit ndërinstitucional dhe rritja e rolit të strukturave vendore në monitorimin e territorit, me qëllim reagimin sa më të shpejtë ndaj çdo vatre të mundshme zjarri.
U theksua se rritja e gatishmërisë, bashkëpunimi i ngushtë mes institucioneve dhe komunitetit, si dhe ndërhyrja në kohë mbeten elementë kyç për mbrojtjen e jetës së qytetarëve, pronës, pyjeve dhe pasurive natyrore të Bashkisë Librazhd.
Në kushtet e temperaturave të larta të stinës së verës, u kërkua angazhim maksimal nga të gjitha strukturat përgjegjëse për të minimizuar rrezikun e zjarreve dhe për të garantuar sigurinë e komunitetit në të gjithë territorin e bashkisë.
