TIRANË, 6 shtator 2026/Albania Express News/- Në kuadër të rritjes së parametrave të sigurisë në territor, Drejtori i Përgjithshëm i Policisë së Shtetit, Drejtues Madhor Skender Hita, zhvilloi takime me strukturat e Drejtorive Vendore të Policisë në Elbasan, Berat dhe Kukës.
Në fokus të takimeve ishte forcimi i masave për parandalimin e ngjarjeve kriminale, ndjekja në dinamikë e konflikteve dhe denoncimeve të qytetarëve, identifikimi dhe arrestimi i personave që qarkullojnë me armë zjarri apo merren me veprimtari të paligjshme në fushën e narkotikëve, si dhe lokalizimi dhe kapja e personave në kërkim.
Gjithashtu, u kërkua intensifikimi i punës për parandalimin e krimeve mjedisore dhe rritja e standardeve të komunikimit të punonjësve të Policisë me qytetarët, me etikë dhe profesionalizëm.
Një vëmendje e veçantë gjatë takimeve iu kushtua sigurisë në shkolla, të cilën Drejtues Madhor Hita e cilësoi si një nga prioritetet kryesore të Policisë së Shtetit.
Me nisjen e vitit të ri shkollor, Hita kërkoi angazhim maksimal të strukturave policore, në bashkëpunim me oficerët e sigurisë në shkolla, për garantimin e një ambienti të sigurt për nxënësit dhe zhvillimin normal të procesit mësimor.
Drejtori i Përgjithshëm kërkoi që shefat e Komisariateve ta ndjekin çdo ditë situatën pranë institucioneve arsimore dhe të trajtojnë drejtpërdrejt çdo shqetësim të adresuar nga shkollat që lidhet me sigurinë e nxënësve.
Në funksion të garantimit të perimetrit të sigurisë, Sektorët e Narkotikëve, strukturat “Shqiponja” dhe ato Operacionale do të kenë një rol të rëndësishëm në monitorimin e zonave pranë shkollave, me qëllim parandalimin e shitjes së lëndëve narkotike dhe konflikteve mes nxënësve apo përfshirjes së personave të jashtëm në këto ambiente.
Siguria rrugore ishte një tjetër çështje e diskutuar gjatë takimeve. Hita kërkoi intensifikimin e monitorimit të qarkullimit rrugor, përfshirë përdorimin e mjeteve inteligjente, me synim parandalimin e aksidenteve dhe ndërhyrjen e menjëhershme ndaj shkeljeve të konstatuara.
Drejtori i Përgjithshëm i Policisë së Shtetit kërkoi që çdo drejtues të mbajë përgjegjësi të drejtpërdrejtë për situatën e sigurisë në territorin që mbulon, duke ndjekur nga afër problematikat dhe duke garantuar reagim të shpejtë, profesional dhe efektiv ndaj shqetësimeve të qytetarëve.
Në këtë kuadër, Hita u kërkoi shefave të Komisariateve dhe drejtorëve vendorë të presin qytetarët, t’i dëgjojnë dhe t’u kushtojnë vëmendje problematikave që lidhen me përgjegjësitë e Policisë së Shtetit. Ai theksoi se edhe vetë do të vijojë të presë qytetarët që kërkojnë takim me të.
Takimet e Drejtorit të Përgjithshëm do të vijojnë në të gjitha Drejtoritë Vendore të Policisë, si dhe në Drejtoritë Vendore për Kufirin dhe Migracionin.
