GRAMSH,29 maj 2026/Albania Express News/Gramshi është zgjuar këtë 29 maj me një lajm të trishtë. Është ndarë nga jeta Pirro Verushi, një nga emrat më të respektuar dhe më të dashur të qytetit, njeriu që për dekada me radhë i dha zë fjalës së shkruar, kulturës dhe jetës intelektuale të komunitetit.
Në orët e para të mëngjesit të kësaj të enjteje, Pirro Verushi humbi betejën me jetën, duke lënë pas dhimbje të madhe tek familjarët, miqtë, kolegët dhe të gjithë ata që patën fatin ta njihnin nga afër. Ikja e tij konsiderohet një humbje e madhe jo vetëm për njerëzit e tij të dashur, por edhe për jetën kulturore e mediatike të Gramshit.
Pirro Verushi do të kujtohet si një punëtor i palodhur i fjalës, si një intelektual i urtë dhe një njeri me vlera të rralla njerëzore. Ai ishte modeli i përkushtimit në profesion dhe i mirëkuptimit në marrëdhënie me të tjerët, duke fituar respektin e të gjithëve me thjeshtësinë dhe korrektësinë që e karakterizonte.
Kontributi i tij në gazetari dhe letërsi mbetet i vyer. Për vite me radhë ai shërbeu si redaktor i gazetës “Përparimi”, ndërsa më pas themeloi dhe botoi gazetën “Shpresa”, duke u bërë një zë i rëndësishëm i komunitetit dhe i jetës publike në Gramsh. Përmes shkrimeve të tij ai trajtoi problematika sociale, njerëzore dhe kulturore, gjithmonë me ndershmëri dhe përgjegjësi qytetare.
Përveç gazetarisë, Pirro Verushi spikati edhe në krijimtarinë letrare. Ai vlerësohej si tregimtar me nivel të admirueshëm artistik dhe si fabulist me mendim të mençur e plot mesazh. Në çdo krijim të tij reflektohej qetësia, urtësia dhe përvoja e një njeriu që jetën e kishte ndërtuar mbi punën, ndershmërinë dhe dashurinë për njerëzit.
Ata që e njohën nga afër e kujtojnë si një njeri fjalëpak e punëshumë, që mirësinë e tij e ndante me këdo pa pritur asgjë në këmbim. Ai mbetet një figurë e dashur dhe e respektuar, një emër që do të vijojë të jetojë në kujtesën e qytetit dhe të gjithë atyre që ndanë kohë e biseda me të.
Portali ynë i shpreh ngushëllimet më të sinqerta nënës së tij, bashkëshortes, djemve, familjarëve dhe gjithë miqve të Pirro Verushit, duke u lutur që të gjejnë forcë për të përballuar këtë humbje të madhe.
Lamtumirë Pirro Verushi! Kujtimi dhe vepra jote do të mbeten gjithmonë pjesë e memories së Gramshit.