TIRANË, 19 maj 2026 /Albania Express News/ Komisioni për Ekonominë, Punësimin dhe Financat ratifikoi marrëveshjen financiare me Bankën Evropiane të Investimeve (BEI), që i hap rrugë financimit të projektit “Porta e Alpeve”, një nga investimet më të rëndësishme infrastrukturore për veriun e vendit.
Gjatë prezantimit të projektit, zëvendësministri i Financave, Endrit Yzeiraj, e cilësoi “Portën e Alpeve” si një ndërhyrje strategjike për zhvillimin ekonomik dhe turistik të Shqipërisë së Veriut.
Sipas tij, projekti synon rritjen e aksesit në zonat veriore, zhvillimin e turizmit të qëndrueshëm, nxitjen e ekonomisë lokale dhe reduktimin e pabarazive rajonale.
“Projekti ‘Porta e Alpeve’ konsiderohet një ndër ndërhyrjet strategjike për rritjen e aksesit në zonat veriore, zhvillimin e turizmit të qëndrueshëm, nxitjen e ekonomisë lokale dhe reduktimin e pabarazive rajonale”, u shpreh Yzeiraj gjatë raportimit në komision.
Ai sqaroi se marrëveshja me BEI parashikon kushte financiare të favorshme, me norma të ulëta interesi dhe periudha të gjata shlyerjeje, duke e bërë investimin të përballueshëm për financat publike.
Deputetët e Komisionit u ndalën te fazat e zbatimit të projektit, ndikimi në zhvillimin e turizmit dhe efektet financiare të huasë për buxhetin e shtetit.
Nga ana e saj, kryetarja e Komisionit për Ekonominë, Punësimin dhe Financat, Milva Ekonomi, theksoi se projekti përfaqëson një investim strategjik për Shqipërinë e Veriut dhe për zhvillimin e turizmit gjithëvjetor.
Sipas Ekonomit, marrëveshja me Bankën Evropiane të Investimeve parashikon një financim prej 50 milionë eurosh për infrastrukturën bashkiake dhe zhvillimin e qëndrueshëm të turizmit në veri të vendit.
Ajo bëri të ditur se projekti synon të lidhë Alpet Shqiptare me bregdetin Adriatik përmes investimeve në rigjenerimin urban, përmirësimin e rrugëve dhe mobilitetit të qëndrueshëm, krijimin e shtigjeve turistike dhe korsive të biçikletave, si dhe zhvillimin e hapësirave publike dhe produkteve të reja turistike.
“Ky është një hap i rëndësishëm për zhvillimin ekonomik, nxitjen e turizmit gjithëvjetor dhe përmirësimin e cilësisë së jetës për komunitetet e Shqipërisë së Veriut”, u shpreh Ekonomi.