TIRANË, 23 gusht 2026/Albania Express News/- Ka ndeshje që harrohen pas vitesh, por ka edhe përballje që shndërrohen në legjenda. Një prej tyre është derbi Partizani-Dinamo i vitit 1961, një duel i jashtëzakonshëm që përfundoi vetëm pas 242 minutash futboll, dy ndeshjeve, pesë periudhave shtesë dhe tre golave.
Më 29 qershor 1961, dy rivalët e mëdhenj të kryeqytetit u përballën në stadiumin “Dinamo” për të përcaktuar kampionin e Shqipërisë. Të dyja skuadrat kishin mbyllur kampionatin me nga 30 pikë, pas 14 fitoresh, dy barazimesh dhe dy humbjesh.
Për shkak të barazimit në renditje, titulli do të vendosej në një ndeshje finale. Por askush nuk mund ta imagjinonte dramën që do të pasonte.
Rreth 20 mijë spektatorë mbushën stadiumin. Në fushë ishin disa nga emrat më të mëdhenj të futbollit shqiptar, mes tyre Sulejman Maliqati, Refik Resmja dhe Panajot Pano te Partizani, ndërsa Dinamo kishte në formacion Skënder Halilin, Namik Jarecin, Stavri Lubonjën dhe Thoma Duron.
90 minutat e para përfunduan 0-0. As dy shtesat nga 15 minuta nuk mjaftuan.
Dhe kur dukej se titulli po shkonte drejt Partizanit, erdhi një nga kthesat më dramatike të historisë së derbit.
Në minutën e 117-të, Refik Resmja shënoi për Partizanin. 1-0. Tribunat shpërthyen në festë.
Por festa zgjati vetëm pak sekonda.
Në minutën e 118-të, Stavri Lubonja goditi nga rreth 30 metra dhe mposhti Maliqatin. 1-1.
Pas 120 minutash lojë, asnjëra skuadër nuk kishte arritur të shpallej kampione. Rregullorja e kohës kërkonte një tjetër përballje.
Më 2 korrik 1961, vetëm tri ditë më vonë, Partizani dhe Dinamo u kthyen sërish në të njëjtin stadium. Edhe këtë herë 90 minutat përfunduan pa gola.
Por as 120 minuta nuk mjaftuan.
Në një moment kur futbollistët kishin tejkaluar kufijtë normalë të lodhjes, erdhi çasti që do ta kthente Panajot Panon në heroin e një prej finaleve më të veçanta të futbollit shqiptar.
Në minutën e 122-të, Pano goditi dhe topi përfundoi në rrjetën e Dinamos.
Partizani 1-0 Dinamo.
Loja u ndërpre menjëherë. Partizani ishte kampion i Shqipërisë.
Ishte një gol që erdhi pas 242 minutash futboll të grumbulluara në dy ndeshje: 120 minuta më 29 qershor dhe 122 minuta më 2 korrik.
Një maratonë e vërtetë futbolli.
Një tjetër detaj e bën këtë histori edhe më të jashtëzakonshme: rregullorja e asaj kohe parashikonte që, nëse edhe ndeshja e dytë do të përfundonte në barazim pas kohës së rregullt dhe shtesave, të luhej një tjetër periudhë shtesë dhe skuadra që do të shënonte e para do të shpallej kampione. Nëse nuk do të kishte gol, parashikohej edhe hedhja e shortit.
Pra, dekada përpara përdorimit të “Golden Goal” në futbollin ndërkombëtar, një mekanizëm i ngjashëm kishte qenë pjesë e rregullave të kësaj finaleje shqiptare.
29 qershor 1961: Partizani 1-1 Dinamo, pas 120 minutash
Golashënues: Resmja 117’, Lubonja 118’
2 korrik 1961: Partizani 1-0 Dinamo, pas 122 minutash
Gol: Panajot Pano 122’
242 minuta, pesë periudha shtesë dhe një gol i fundit që i dha Partizanit titullin.
Një derbi që nuk u mbyll pas 90 minutash, por u shndërrua në një prej kapitujve më të paharrueshëm të historisë së futbollit shqiptar./S.SH
