Gjatë mbledhjes së radhës të zhvilluar sot, Këshilli Bashkiak i Bashkisë Elbasan ka miratuar emërimin e z. Elsid Zyma në detyrën e Sekretarit të Këshillit Bashkiak të Elbasanit, një pozicion kyç në funksionimin administrativ dhe institucional të këtij organi vendor.
Emërimi i z. Zyma vjen si rezultat i një eksperience të gjatë dhe të konsoliduar profesionale në administratën publike, drejtimin institucional dhe sipërmarrjen private, duke e kthyer atë në një profil të njohur dhe të vlerësuar në jetën publike të qytetit të Elbasanit.
Një karrierë e pasur profesionale dhe institucionale
Që prej vitit 2005 e në vijim, z. Elsid Zyma është angazhuar në biznes privat, si zotërues i firmës “Zyma”, në fushën e produkteve ushqimore. Në këtë aktivitet ai ka ushtruar drejtimin dhe menaxhimin e biznesit, administrimin e magazinës dhe stafit, ruajtjen e marrëdhënieve të qëndrueshme me klientët, si dhe organizimin e fushatave promocionale dhe studimin e tregut për zhvillimin e mëtejshëm të aktivitetit.
Në periudhën shtator 2009 – shtator 2010, z. Zyma ka shërbyer pranë Bashkisë Elbasan në pozicionin e Specialistit të vendosjes së tatim-taksave, një eksperiencë që i ka mundësuar njohje të thelluara në fushën fiskale dhe zbatimin praktik të njohurive universitare.
Më pas, në nëntor 2013 – shkurt 2014, ai ka ushtruar detyrën e Zëvendësdrejtorit pranë Ujësjellës-Kanalizime Elbasan “Elber” Sh.p.k, ku është dalluar për përkushtim dhe përgjegjësi në ushtrimin e funksioneve drejtuese.
Karriera e tij në këtë institucion ka vijuar me:
• Shef i Departamentit të Përgjithshëm të Shërbimeve (shtator 2014 – shtator 2015)
• Drejtor i Përgjithshëm i Ujësjellës-Kanalizime Elbasan sh.a. (shtator 2015 – prill 2016)
Në këtë detyrë të lartë drejtuese, z. Zyma ka mbuluar aktivitete kyçe si drejtimi teknik, programimi dhe ndjekja e fondeve operative dhe investive, si dhe mbikëqyrja dhe monitorimi i projekteve në zbatim.
Nga qershor 2018 deri në shtator 2019, ai ka ushtruar detyrën e Drejtorit Rajonal të Entit Kombëtar të Banesave për Elbasanin, ku fokusi kryesor ka qenë financimi dhe adresimi i nevojave për strehim të popullatës.
Ndërsa në shkurt 2021 – korrik 2025, z. Elsid Zyma ka shërbyer si Administrator i Njësisë Administrative Nr. 2 pranë Bashkisë Elbasan, duke u angazhuar drejtpërdrejt në menaxhimin e shërbimeve dhe çështjeve që lidhen me komunitetin.
Prej gushtit 2025 e deri më tani, ai mban detyrën e Drejtorit të Administratës pranë Drejtorisë së Sportit dhe Kulturës, duke kontribuar në organizimin dhe funksionimin administrativ të këtij sektori të rëndësishëm për jetën kulturore dhe sportive të qytetit.
Formimi arsimor dhe aftësitë
Z. Elsid Zyma ka përfunduar:
• Arsimin e mesëm të përgjithshëm në shkollën “Kostandin Kristoforidhi” (2001–2005)
• Fakultetin Ekonomik, dega Ekonomia dhe e Drejta (2005–2009)
Ai zotëron certifikata në programe bazë kompjuterike, gjuhë të huaja dhe specializime të ndryshme profesionale, si dhe është pajisur me patentë drejtimi të klasit B dhe C.
Një emërim që synon forcimin institucional
Emërimi i z. Elsid Zyma në postin e Sekretarit të Këshillit Bashkiak të Elbasanit pritet të kontribuojë në rritjen e eficiencës administrative, korrektësisë procedurale dhe forcimit të bashkëpunimit institucional brenda Këshillit Bashkiak, duke vënë në shërbim të këtij institucioni përvojën e tij shumëvjeçare në administratë dhe drejtim.