Presidenti i Republikës, Bajram Begaj, priti të premten në Presidencë një grup trashëgimtarësh të patriotëve çamë, të cilët luftuan, u internuan dhe dhanë jetën gjatë Luftës së Dytë Botërore.
Në fjalën e tij, Kreu i Shtetit vlerësoi kontributin e çamëve në luftën kundër fashizmit dhe nazizmit, duke theksuar se ata janë pjesë e historisë kombëtare dhe një vlerë e çmuar për Shqipërinë.
“Patriotët çamë luftuan, u internuan dhe dhanë jetën në betejën kundër fashizmit dhe nazizmit. Ky komunitet ka dhënë kontribute të njohura e pozitive dhe përbën gjithmonë një vlerë të çmuar me arritje të rëndësishme në historinë tonë,” – u shpreh Presidenti Begaj.
Në këtë takim morën pjesë personalitete të komunitetit çam, mes tyre kryetari i Shoqatës “Çamëria”, Nimet Mehmeti. Ndër të pranishmit ishin edhe dy 95-vjeçarë që, si adoleshentë në moshën 15-vjeçare, përjetuan dhe morën pjesë aktivisht në Luftën e Dytë Botërore.
Gjithashtu, i pranishëm ishte edhe shkrimtari Luan Rama, nipi i heroit të popullit Ali Demi, i cili ra heroikisht në betejë kundër pushtuesve gjermanë kur ishte vetëm 25 vjeç.
Ky takim shënoi një moment reflektimi dhe mirënjohjeje për sakrificat e brezave të mëparshëm, duke e theksuar edhe një herë rolin e pazëvendësueshëm të komunitetit çam në historinë e Shqipërisë.