TIRANË ,10 qershor 2026/Albania Express News/Pas qëndrimit për gati tre orë në Bulevard, protestuesit kanë vijuar mbrëmjen me një marshim nëpër rrugët kryesore të kryeqytetit.
Marshimi ka nisur nga Bulevardi, për të vijuar më pas pranë Ministrisë së Brendshme dhe Bashkisë së Tiranës. Më tej, protestuesit kanë kaluar pranë Torre Drinit, duke vazhduar rrugën drejt zonës së Nëntë-Katësheve dhe Hotel Tiranës.
Protestuesit janë futur mes makinave, ku shoferët në shenjë solidarizimi i kanë ‘përshëndetur’ duke u rënë borive.
Më pas, ata kanë vijuar në aksin Rruga e Kavajës-Myslym Shyri, për të kaluar më tej në zonën e 21 Dhjetorit dhe Komunës së Parisit. Marshimi ka vazhduar drejt Sheshit Wilson dhe zonës së Librit Universitar.
Në përfundim të itinerarit, protestuesit janë drejtuar pranë Presidencës, e më pas duke ‘u stacionuar’ sërish para Kryeministrisë.