BOTËRORI 2026/Albania Express News/Botërori 2026 pritet të sjellë jo vetëm garën për trofeun më prestigjioz të futbollit, por edhe një duel të veçantë mes dy prej yjeve më të mëdhenj të këtij brezi: Lionel Messi dhe Kylian Mbappé. Të dy sulmuesit janë shumë pranë rekordit historik të golashënuesit më të mirë të të gjitha kohërave në Kupën e Botës, që mbahet nga Miroslav Klose me 16 gola.
Aktualisht, Messi numëron 13 gola në pesë edicione të Botërorit, ndërsa Mbappé ka realizuar 12 gola në vetëm dy pjesëmarrje. Kjo do të thotë se argjentinasi ka nevojë për tre gola për të barazuar rekordin e Kloses dhe katër për ta kaluar atë, ndërsa francezi duhet të shënojë katër gola për të barazuar dhe pesë për t’u bërë rekordmen i ri.
Botërori që zhvillohet këtë verë në SHBA, Kanada dhe Meksikë mund të jetë skena ideale për thyerjen e këtij rekordi historik. Messi pritet të luajë turneun e fundit të karrierës së tij në Kupën e Botës, duke e bërë këtë një mundësi të artë për të lënë gjurmën e fundit në historinë e futbollit. Nga ana tjetër, Mbappé, në moshën 27-vjeçare, shihet si kandidati më i fortë për të marrë fronin e golashënuesve, pasi ka ende disa Botërorë përpara.
Renditja aktuale e golashënuesve më të mirë në historinë e Botërorit kryesohet nga Klose me 16 gola, i ndjekur nga Ronaldo Nazário me 15 dhe Gerd Müller me 14. Messi ndodhet në kuotën e 13 golave, ndërsa Mbappé me 12.
Me Argjentinën dhe Francën që konsiderohen mes favoritëve për të shkuar larg në turne, gjithçka mbetet e hapur. Nëse Messi kërkon ta mbyllë karrierën me një rekord legjendar, Mbappé synon të nisë epokën e tij si mbreti i ri i Botërorit. Një gjë është e sigurt: rekordi i Kloses nuk ka qenë kurrë më i rrezikuar se tani.