TIRANË,29 maj 2026/Albania Express News/Kur kanë mbetur edhe 90 minuta nga mbyllja e sezonit futbollistik 2025-2026, futbolli shqiptar po përjeton një nga fundet më dramatike të viteve të fundit. Tre skuadra ,Egnatia, Vllaznia dhe AF Elbasani vijojnë të jenë në garë për trofeun e kampionit, ndërsa Dinamo City, ndonëse jashtë luftës për titullin, është skuadra që mund të vendosë fatin e kampionatit.
Të dielën në 31 maj në orën 19:00 do të luhen njëkohësisht dy sfidat vendimtare të “Final Four”, që do të zbardhin enigmën e madhe të sezonit. Në “Air Albania” përballen AF Elbasani dhe Vllaznia, ndërsa në “Elbasan Arena” do të luhet dueli Egnatia – Dinamo City.
Ironia e këtij fundi sezoni është se Dinamo City, skuadra e vetme që nuk ka më një objektiv konkret në këtë fazë, mund të ndikojë drejtpërdrejt te emri i kampionit të ri të Shqipërisë. Një rezultat pozitiv i bluve ndaj Egnatias do të hapte skenarë të rinj dhe do ta kthente sfidën mes Elbasanit dhe Vllaznisë në një finale të vërtetë për titullin. Në të kundërt, një fitore e Egnatias do ta kurorëzonte skuadrën e Rrogozhinës me kurorën e kampiones.
Në letër, Egnatia duket skuadra më e favorizuar pasi dy rivalët e saj i ka mundur bindshëm në “Final Four”. Kampionët në fuqi kanë treguar stabilitet gjatë gjithë sezonit dhe përballë kanë një Dinamo City që nuk ka më presion rezultati. Megjithatë, futbolli shqiptar ka treguar shpesh se ndeshjet më të vështira janë pikërisht ato ku kundërshtari hyn në fushë pa asgjë për të humbur.
Nga ana tjetër, Vllaznia dhe AF Elbasani do të përplasen në një duel ku gabimet nuk falen. Të dy ekipet kanë zhvilluar një sezon fantastik dhe e dinë se vetëm fitorja mund t’u japë garanci për të mbajtur gjallë ëndrrën e titullit deri në sekondën e fundit.
Kalkulimet e mundshme të titullit
- Nëse Egnatia fiton ndaj Dinamo City, atëherë skuadra rrogozhinase do të jetë absolutisht pranë titullit dhe nuk do të ketë nevojë të shohë me shumë interes çfarë ndodh në sfidën tjetër.
- Nëse Egnatia barazon ose humbet, ndërsa në duelin tjetër del një fitues mes Elbasanit dhe Vllaznisë, atëherë gara mund të marrë një kthesë të papritur dhe titulli të përfundojë në duart e njërës prej këtyre dy skuadrave.
- Një tjetër skenar dramatik do të ishte që Egnatia të mos fitojë dhe ndeshja Elbasani – Vllaznia të prodhojë fitues të qartë, duke e kthyer atë skuadër në pretendente kryesore për kurorën.
- Edhe barazimet në të dy takimet mund të sjellin llogari të ndërlikuara, duke e mbajtur pezull verdiktin deri në momentet e fundit të shpalljes zyrtare.
Statistikat sezonale tregojnë se asnjë prej këtyre përballjeve nuk ka favorit absolut. Vllaznia ka pasur epërsi ndaj Egnatias në duelet direkte të sezonit, ndërsa AF Elbasani dhe Dinamo City kanë ndarë fitore e humbje në përballjet mes tyre. Kjo e bën edhe më të paparashikueshme fundjavën që pritet me interes nga i gjithë opinioni sportiv shqiptar.
Një gjë është e sigurt ,mbrëmjen e së dielës do të marrë fund një nga garat më emocionuese të viteve të fundit. Deri atëherë, tifozët e Egnatias, Vllaznisë dhe AF Elbasanit do të vazhdojnë të bëjnë llogari, ndërsa Dinamo City do të mbetet skuadra që, pa qenë në garë për trofeun, mund të vendosë se kush do të ngrejë kupën e kampionit të Shqipërisë.
Enigma është ende e hapur. Përgjigjja do të vetëm me fishkëllimën e fundit të dy sfidave që do të mbajnë të mbërthyer nga emocione të gjithë futbollin shqiptar deri të dielën në mbrëmje .