Peqin – Finalizohet me sukses operacioni policor i koduar “Kurtaj”, i zhvilluar për goditjen e kultivimit të bimëve narkotike në ambiente të mbyllura, duke përdorur llamba dhe pajisje elektrike për rritjen e tyre.
Operacioni u koordinua nga Drejtoria për Krimet në Volum në kuadër të Drejtorisë së Përgjithshme të Policisë së Shtetit, në bashkëpunim me DVP Elbasan dhe Komisariatin e Policisë Peqin, nën drejtimin e Prokurorisë Elbasan.
Gjatë kontrollit në fshatin Kurtaj, njësia administrative Gjocaj, u zbuluan dy ambiente të përshtatura për kultivimin e bimëve narkotike, ku u konstatuan rreth 4000 bimë kanabisi, si dhe llamba, neonë dhe pajisje të tjera elektrike.
Nga hetimet rezultoi se ambientet i përkisnin shtetasit Bilal Hasa, drejtor i burgut Rrogozhinë, i cili u shpall në kërkim.
Gjithashtu, për veprën penale “Shpërdorimi i detyrës”, u shpall në kërkim edhe shtetasi Elvis Maçi përgjegjës i OSHEE-së për zonën e Peqinit.
Policia dhe Prokuroria vijojnë punën për kapjen e personave të shpallur në kërkim dhe identifikimin e të gjithë individëve të përfshirë në këtë veprimtari kriminale.
Operacioni tregon angazhimin e vazhdueshëm të strukturave të rendit në luftën kundër kultivimit të paligjshëm të narkotikëve në ambiente të mbyllura.