GJKKO këtë të hënë do të zhvillojë seancën e radhës paraprake për dosjen “Meta”. Presidenti i PL-së, Ilir Meta në seancën e kaluar ka qenë i pranishëm dhe kërkoi që të njihet me aktet.
GJKKO ka urdhëruar SPAK që Metës t’i vendoset në dispozicion një pjesë e akteve. Meta mësohet se ka kërkuar vetëm një pjesë të akteve ku SPAK pretendon se implikojnë ish-presidentin.
Ilir Meta u arrestua më 21 tetor të vitit 2024. Meta dhe deputetja, Monika Kryemadhi dyshohen se në bashkëpunim dhe me funksionarë të tjerë shtetërorë kanë shfrytëzuar postet e tyre shtetërore e politike.
Sipas akuzave dyshohet se ata kanë favorizuar kompani private si dhe në veprimtari të tjera me lobime në SHBA dhe shitblerje banesash në këmbim të përfitimit të shumave të konsiderueshme parash, të cilat janë përpjekur t’i fshehin.
Meta akuzohet për veprat penale “korrupsion pasiv”, “pastrim parash” dhe “fshehje të pasurisë”. SPAK ka mbyllur hetimet më 28 korrik, ndërsa dosjen e kaloi për gjykim në fund të gushtit.