Partia Demokratike, Dega Kavajë zhvilloi ceremoninë zyrtare me rastin e 35-vjetorit të themelimit, në prani të kryetarit të PD-së, Sali Berisha.
Aktiviteti u shoqërua me mesazhe për atë që u vlerësua si rol historik i Kavajës në rrëzimin e regjimit komunist dhe në themelimin e pluralizmit politik në Shqipëri.
Në fjalën e tij, Berisha tha se, “ishte sakrifica, burrëria, trimëria e qytetarëve të Kavajës dhe e grupeve antikomuniste të saj që hodhën themelet e pluralizmit dhe u bënë frymëzim për lëvizjen studentore”.
Ai theksoi se, ndonëse formalisht dega e PD-së në Kavajë u themelua më 17 dhjetor 1990, roli i qytetit në realizimin e misionit historik, kishte nisur më herët.
“Partia Demokratike e Shqipërisë, aq sa u themelua në Qytetin Studenti, po aq u themelua edhe në qytetin e Kavajës”, deklaroi Berisha.
Duke iu referuar historisë së lëvizjes antikomuniste, Berisha kujtoi demonstratat e janarit dhe kryengritjen paqësore të marsit në Kavajë.
“Lëvizja antikomuniste në Kavajë ishte më e fuqishmja në Shqipëri. Me betejën e tyre, qytetarët e Kavajës e bënë qytetin e parë të lirë të vendit dhe frymëzuan shqiptarët kudo”, tha ai, duke nderuar figurën e Josif Budës, të cilin e cilësoi “heroi i parë i demokracisë shqiptare”.
Berisha vlerësoi gjithashtu rolin e qytetit në mbështetjen e forcave demokratike gjatë viteve të para të pluralizmit.
“Ishit ju, qytetarët e Kavajës, që u bëtë mburojë për forcat demokratike dhe postbllok i lirisë”, theksoi ai.
Berisha gjithashtu renditi disa nga arritjet e qeverisjeve të PD-së, duke përmendur anëtarësimin e Shqipërisë në NATO, lëvizjen e lirë dhe investimet në infrastrukturë.
“Ia dolëm ta shkëpusim Shqipërinë nga honet e varfërisë, ta anëtarësojmë në NATO dhe të pranojmë rotacionin si kusht themelor të demokracisë”, u shpreh Berisha.
Berisha gjithashtu deklaroi se Partia Demokratike mbetet e vendosur përballë sfidave aktuale.
“Sot, Partia Demokratike vjen në këtë 35-vjetor po aq e vendosur, sa ditën e themelimit të saj”, tha Berisha, duke shtuar se PD synon të mbrojë votën dhe parimet demokratike.