Flamurtari ka dhënë një sinjal të fortë ringritjeje në luftën për mbijetesë, duke marrë një fitore shumë të rëndësishme 1-0 në fushën e Egnatias. Vlonjatët zhvilluan një ndeshje shumë të kujdesshme ndaj kampionëve në fuqi, të cilët po luftojnë për vendin e parë në renditje, dhe goditën saktë në kundërsulm, duke shkatërruar planet e rrogozhinasve.
Më pas, Flamurtari administroi me maturi lojën në të dy fazat, duke mbajtur larg portës sulmin e rrezikshëm të Egnatias dhe duke siguruar tre pikë të arta që e afrojnë ndjeshëm me grupin e skuadrave jashtë zonës së ftohtë.
Vora dhe Vllaznia kanë ndarë pikët në stadiumin “Loro Boriçi”, në një ndeshje pa gola, por jo pa raste të pastra shënimi. Sfida e vlefshme për javën e 14-të të Superiores tregoi sërish momentin e vështirë të Vllaznisë së Edi Martinit, e cila nuk njeh fitore prej përballjes me Dinamon. Pas barazimit me Partizanin dhe humbjes ndaj Teutës, shkodranët regjistruan një tjetër ndalesë zhgënjyese.
Nga ana tjetër, Vora largohet e kënaqur me një pikë, që e mban në vendin e shtatë të renditjes. Ky barazim për ekipin e Arjan Bellajt vjen pas rezultatit 1-1 ndaj Flamurtarit në Vlorë.
