Administrata e presidentit amerikan Donald Trump, në bashkëpunim me zyrtarë rusë, ka hartuar një propozim të ri për t’i dhënë fund luftës së Rusisë në Ukrainë.
Sipas burimeve, plani i është paraqitur ditët e fundit Kievit nga i dërguari i posaçëm i SHBA-së, Steve Witkoff. Mediat ndërkombëtare raportojnë se dokumenti, i përbërë nga 28 pika, parashikon lëshime të mëdha nga Ukraina.
Ndër to, dorëzimi i territorit të mbetur të Donbasit, përgjysmimi i ushtrisë ukrainase, kufizimi i armatimeve, ndërprerja e një pjese të ndihmës ushtarake amerikane dhe ndalimi i pranisë së trupave të huaja në territorin ukrainas.
Një pikë tjetër e debatueshme e draftit është njohja e gjuhës ruse si gjuhë zyrtare në Ukrainë.
Burime nga Kievi e kanë cilësuar planin si thellësisht të njëanshëm, ndërsa disa zyrtarë amerikanë e interpretojnë si një përpjekje për të përcaktuar pritshmëritë e Moskës për hapjen e negociatave.
Propozimi vjen në një moment të ndërlikuar për presidentin ukrainas Volodymyr Zelensky, i cili po përballet me një skandal korrupsioni brenda rrethit të tij të ngushtë, duke rritur presionin politik të brendshëm dhe kritikat brenda partisë së tij.
Publikimi i dokumentit ka lënë gjurmë edhe në tregjet ndërkombëtare: çmimet e naftës kanë rënë ndjeshëm, pasi investitorët presin ulje të rreziqeve të furnizimit të lidhura me sanksionet e fundit amerikane ndaj kompanive ruse të energjisë.