MALLAKASTËR ,05 gusht 2026/Albania Express News/-Situata nga zjarri masiv në Mallakastër vijon të mbetet alarmante.
Flakët kanë dalë jashtë kontrollit, duke përfshirë sipërfaqe të mëdha me pyll pishe dhe bimësi, ndërsa të favorizuara nga era e fortë janë përhapur me shpejtësi.
Zjarri ka kaluar edhe rrugën që lidh fshatin Riban me Panahorin dhe po avancon në drejtim të fshatit Drenije, në territorin e Bashkisë Patos. Në terren ndodhen forca të shumta zjarrfikëse, efektivë të Forcave të Armatosura, punonjës të Emergjencave Civile dhe banorë të zonës, të cilët po punojnë pa ndërprerje për izolimin e vatrave dhe vënien nën kontroll të flakëve.
Aktualisht nuk raportohet për banesa të rrezikuara, por situata mbetet kritike për shkak të erës së fortë, e cila po favorizon përhapjen e zjarrit. Operacioni për shuarjen e flakëve vijon.