Trupat e 19 emigrantëve u nxorën nga një varkë pranë brigjeve të Lampeduzës të mërkurën nga roja bregdetare italiane, tha kryebashkiaku i ishullit.
Kryebashkiaku Filippo Mannino tha se shtatë migrantë të tjerë, përfshirë dy fëmijë, po trajtoheshin për “hipotermi dhe dehje nga tymi i hidrokarbureve”.
Operacioni i shpëtimit ndodhi në orët e para të së mërkurës, 135 kilometra larg ishullit italian, brenda zonës së kërkim-shpëtimit të Libisë, raportoi ANSA.
“Besohet se të gjithë kanë vdekur nga hipotermia”, shkroi agjencia, e cila përmendi erërat e forta, shiun dhe temperaturat e ulëta në zonë.
Lampedusa është një pikë kyçe zbarkimi për migrantët që kalojnë Detin Mesdhe nga Afrika e Veriut, shumë prej të cilëve vdesin duke provuar udhëtimin e rrezikshëm.
Ndërkohë, një varkë me shpejtësi që transportonte migrantë afganë u përmbys në Detin Egje të mërkurën, ndërsa përpiqej t’i shmangej rojes bregdetare në ujëra të trazuara, duke lënë 19 të vdekur, përfshirë një foshnjë, thanë zyrtarët.
Komanda e Rojës Bregdetare Turke tha se varka që transportonte dhjetëra migrantë injoroi paralajmërimet e përsëritura për t’u ndalur dhe u përpoq të ikte me shpejtësi të lartë.
Varka filloi të mbushte ujë në detin e trazuar dhe përfundimisht u përmbys. Të paktën 20 emigrantë të tjerë u shpëtuan.
Mbytja ndodhi pranë qytetit bregdetar të Bodrumit, një destinacion i njohur turistik në Turqi.
Të gjithë migrantët ishin nga Afganistani dhe midis viktimave ishte edhe një foshnjë, sipas Idris Akbıyık, guvernatorit të provincës Muğla ku ndodhet Bodrumi, siç citohet nga agjencia shtetërore Anadolu.