Britania e Madhe do të mbledhë rreth 35 vende për të diskutuar rihapjen e Ngushticës së Hormuzit, e bllokuar nga lufta në Lindjen e Mesme. Qëllimi është rikthimi i lirisë së lundrimit dhe stabilizimi i furnizimeve globale.
Britania e Madhe do të organizojë këtë javë një takim me rreth 35 vende për të diskutuar rihapjen e Ngushticës strategjike të Hormuzit, e cila është bllokuar për shkak të konfliktit në Lindjen e Mesme.
Kryeministri britanik, Keir Starmer, bëri të ditur se diskutimet do të drejtohen nga sekretarja e Jashtme, ndërsa do të fokusohen në masat diplomatike dhe politike për rikthimin e lirisë së lundrimit dhe sigurinë e anijeve.
“Do të shqyrtojmë të gjitha opsionet për të garantuar kalimin e sigurt dhe rifillimin e lëvizjes së mallrave jetike,” u shpreh Starmer.
Pas takimit, Londra pritet të thërrasë edhe planifikuesit ushtarakë për të vlerësuar mënyrat e sigurimit të ngushticës pas përfundimit të luftimeve.
Në këtë iniciativë marrin pjesë vende si Britania, Franca, Gjermania, Italia, Japonia dhe Holanda, të cilat kanë shprehur gatishmërinë për të kontribuar në garantimin e kalimit të sigurt.
Ngushtica e Hormuzit, përmes së cilës kalon rreth një e pesta e naftës dhe gazit të lëngshëm në botë, është bllokuar pothuajse plotësisht nga Irani pas nisjes së luftës më 28 shkurt, duke shkaktuar rritje të ndjeshme të çmimeve globale të energjisë.
Ndërkohë, Starmer riafirmoi mbështetjen e plotë për NATO-n, duke e cilësuar si aleancën më efektive ushtarake në botë, në përgjigje të kritikave të Presidentit amerikan Donald Trump.