LEZHA ,01 gusht 2026/Albania Express News/-Një ngjarje me armë zjarri është regjistruar mbrëmjen e sotme në Lezhë, ku një person ka qëlluar me armë në drejtim të një automjeti tjetër, ndërsa më pas është larguar nga vendi i ngjarjes.
Sipas informacioneve paraprake të Policisë, incidenti ka ndodhur rreth orës 18:00, në zonën e Urës së Milotit. Dyshohet se shtetasi Gj. Gj., i cili udhëtonte me një automjet tip “Audi”, ka qëlluar me armë zjarri drejt një tjetër automjeti tip “Audi”, që ishte në lëvizje dhe drejtohej nga shtetasi M. J., 30 vjeç, banues në Rubik.
Fatmirësisht, nga të shtënat nuk ka persona të lënduar. Drejtuesi i automjetit tjetër ka shpëtuar pa dëmtime, ndërsa autoritetet kanë nisur menjëherë kontrollet për kapjen e personit të dyshuar.
Shërbimet e Policisë vijojnë ndjekjen e autorit, ndërsa grupi hetimor ndodhet në vendngjarje dhe, nën drejtimin e Prokurorisë, po kryen veprimet hetimore për zbardhjen e plotë të rrethanave.
Ende nuk dihen motivet e konfliktit dhe nëse personat e përfshirë kanë pasur më herët konflikte mes tyre. Hetimet vijojnë për dokumentimin ligjor të ngjarjes dhe përcaktimin e përgjegjësive.