Sopoti i Librazhdit dhuroi një nga paraqitjet më mbresëlënëse të këtij sezoni, duke ndalur kryesuesit e Besëlidhjes në një barazim 1-1 që flet shumë më tepër sesa rezultati. Edhe pse me dy mungesa të rëndësishme në formacion dhe duke luajtur që nga minuta e 27-të me një futbollist më pak, skuadra vendase tregoi zemër, organizim dhe një shpirt gare për t’u admiruar.
Përballë një Besëlidhjeje që udhëtonte në Librazhd me objektivin e qartë për të mbyllur garën për titull, Sopoti u shfaq i vendosur, kompakt dhe inteligjent taktikisht. Edhe në inferioritet numerik pas kartonit të kuq për Troksin, vendasit nuk u tërhoqën, por u riorganizuan shkëlqyeshëm, duke mbyllur hapësirat dhe duke rezistuar me dinjitet ndaj presionit të vazhdueshëm të lezhjanëve.
Pjesa e parë u mbyll pa gola, por me Sopotin që tregoi se nuk ishte aspak inferior ndaj kryesuesve. Në të dytën, pas golit të Besëlidhjes në minutën e 78-të, shumëkush mendoi se gjithçka kishte përfunduar. Por jo për këtë Sopoti.Me karakter kampionësh, me mbështetjen e publikut dhe me një besim të palëkundur, skuadra e Librazhdit u hodh në sulm dhe u shpërblye në minutat e fundit. Aminu, me një aksion të shkëlqyer, barazoi shifrat pesë minuta para fundit, duke shpërthyer stadiumin dhe duke kurorëzuar një paraqitje për t’u duartrokitur.
Ky barazim e mban Besëlidhjen në krye me 30 pikë, por Sopoti, me 27 pikë në vendin e dytë, dërgoi një mesazh të fortë: kjo skuadër nuk dorëzohet kurrë dhe është një pretendente reale. Loja, sakrifica dhe karakteri i treguar ndaj kryesuesve janë prova më e qartë se Sopoti meriton respekt maksimal në Grupin A të Kategorisë së Dytë.Një ndeshje që do të mbahet mend gjatë në Librazhd ,jo vetëm për rezultatin, por për mënyrën se si Sopoti luftoi deri në frymën e fundit.
Albania Express News