Elbasani është zgjuar sot me një lajm të trishtë. Më 20 prill 2026, ka ndërruar jetë bashkëqytetari i nderuar Petrit Graceni, një figurë e respektuar për vlerat e tij njerëzore, familjare dhe qytetare, lajmi i të cilit u bë publik nga Organizata Kombëtare për Dëshmorët e LANÇ dhe Dëshmorëve të tjerë të Atdheut.
Në mesazhin e publikuar në rrjetet sociale, organizata e përshkruan Petrit Gracenin si një njeri fisnik, bashkëshort të përkushtuar, prind dhe gjysh shembullor, i cili gjatë gjithë jetës së tij ruajti dhe përcolli me dinjitet traditat më të mira të një familjeje të vjetër elbasanase, me rrënjë të thella atdhetarie dhe mikpritjeje.
I lindur dhe rritur në një ambient ku vlerat qytetare dhe dashuria për vendin ishin themel i edukimit, Graceni arriti t’i trashëgojë këto parime tek familja e tij, duke lënë pas një model të rrallë përkushtimi dhe harmonie. Vajzat e tij, Xheri dhe Driada, si dhe nipërit Bruno, Enxho dhe Ermali, mbeten dëshmia më e gjallë e kësaj trashëgimie.
Sipas organizatës, ai ishte një njeri me karakter të fortë dhe virtyte të larta, që besonte në rëndësinë e familjes dhe shoqërisë së shëndoshë, si dhe në ruajtjen e vlerave kombëtare. Një vend të veçantë në ndjeshmërinë e tij zinte Lufta Antifashiste Nacional Çlirimtare, të cilën e konsideronte simbol të sakrificës dhe idealit për liri.
Si bashkëshort i Xhuljeta Gracenit, një figurë e njohur në drejtimin e organizatës së dëshmorëve në Elbasan dhe më gjerë, Petriti ishte një mbështetje e fortë dhe e vazhdueshme për çdo aktivitet në nderim të dëshmorëve të atdheut, duke kontribuar me përkushtim dhe përulësi.
Largimi i tij nga jeta ka lënë një boshllëk të madh jo vetëm në familje, por edhe në komunitetin elbasanas dhe në radhët e organizatës që ai mbështeti ndër vite. Megjithatë, figura dhe emri i Petrit Gracenit do të mbeten të gjalla, si një shembull frymëzimi për brezat e sotëm dhe të ardhshëm.
Prehu në Paqe Petrit Gracini .Kujtimi i tij do të jetojë gjatë mes nesh.