Sinoptikani grek Sakis Arnaoutoglou ka paralajmëruar për përkeqësim të rëndë të motit në zonat perëndimore dhe veriperëndimore të Shqipërisë. Sipas tij, nga mesdita e së shtunës deri të dielën në mesditë priten reshje të dendura shiu, stuhira të forta me vetëtima, breshër dhe rrezik i lartë për përmbytje.
Situata paraqitet veçanërisht e rrezikshme në zonat e ulëta dhe pranë lumenjve. Policia Rrugore apelon për kujdes maksimal në rrugë, respektimin e shpejtësisë, shmangien e alkoolit, përdorimin e rripit të sigurimit dhe jelekëve fosforeshentë për motomjetet. Qytetarëve u rekomandohet të shmangin lëvizjet e panevojshme gjatë stuhive.
Edhe lundrimi është i kufizuar: dalja e mjeteve të vogla dhe peshkarexhave jashtë gjirit të Vlorës, si dhe në Sarandë, Ksamil dhe Borsh, është ndaluar deri në përmirësimin e kushteve atmosferike. Autoritetet paralajmërojnë se mosrespektimi i këtyre masave mund të ketë pasoja serioze për jetën dhe pronën.