Selanik :Në një kohë kur gazetaria përballet me sfida të reja dhe gjithnjë e më komplekse, Selaniku priti Konferencën e 3-të Ndërkombëtare për Sigurinë e Gazetarëve, një ngjarje me rëndësi të veçantë për të ardhmen e medias globale.
E organizuar nga Qendra Ndërkombëtare e Trajnimit për Sigurinë e Gazetarëve dhe Profesionistëve të Medias (ICSJ), konferenca u fokusua në temën aktuale dhe delikate: “Të dëshmosh: Trauma dhe qëndrueshmëria në gazetarinë moderne”, duke vënë në qendër të diskutimit ndikimin psikologjik të profesionit të gazetarit.
Në këtë forum ndërkombëtar morën pjesë përfaqësues të institucioneve globale, autoritete rregullatore, akademikë dhe profesionistë të medias, të cilët ndanë eksperiencat dhe shqetësimet mbi sigurinë dhe mirëqenien e gazetarëve në një realitet mediatik që po bëhet gjithnjë e më sfidues.
Një nga momentet kryesore ishte paneli me temë “Institucionalizimi i qëndrueshmërisë: qasje strategjike dhe politike ndaj traumave në gazetari”, ku u diskutuan politika konkrete dhe mekanizma mbështetës për gazetarët. Në këtë panel kontribuan figura të njohura si Adrien Collin nga Federata Europiane e Gazetarëve, Cecilia Lagomarsino nga OSBE, Radica Zekovic dhe Nikos Panagiotou nga Universiteti Aristotel i Selanikut.
Diskutimet u zgjeruan edhe në tema të tjera kritike, si ndikimi i përmbajtjeve digjitale dhe ekspozimi ndaj materialeve sensitive, rreziqet në terrene me konflikt apo tension të lartë, si dhe nevoja për ndërtimin e redaksive më të forta dhe të përgatitura për përballimin e presionit psikologjik.
Konferenca u vlerësua si një platformë kyçe ndërkombëtare, që jo vetëm nxiti shkëmbimin e praktikave më të mira, por edhe forcoi bashkëpunimin mes aktorëve globalë për mbrojtjen e gazetarëve. Në thelb, mesazhi ishte i qartë: një media e lirë dhe e sigurt është themeli i një shoqërie demokratike të shëndetshme.
