Drejtoresha e Bankës Qendrore Europiane, Christine Lagarde, ka paralajmëruar se ekonomia e Europës nuk mund të ecë përpara pa fuqinë punëtore të emigrantëve.
Në një fjalim të mbajtur në Wyoming të SHBA, Lagarde theksoi se emigrantët kanë qenë vendimtarë për ruajtjen e rritjes ekonomike dhe vendeve të punës në eurozonë, sidomos gjatë krizave të fundit me energjinë dhe inflacionin.
Sipas saj, edhe pse në vitin 2022 emigrantët përbënin vetëm 9% të fuqisë punëtore, ata kanë dhënë gjysmën e rritjes së saj gjatë tre viteve të fundit. “Pa këtë kontribut, tregu i punës do të ishte në vështirësi dhe prodhimi ekonomik më i ulët,” nënvizoi Lagarde.
Gjermania dhe Spanja u përmendën si shembuj konkretë: ekonomia gjermane do të ishte rreth 6% më e vogël pa emigrantët, ndërsa rimëkëmbja e shpejtë e Spanjës i detyrohet kryesisht fuqisë punëtore të huaj.
Lagarde shtoi se emigracioni ka ndihmuar në zbutjen e pasojave të plakjes së popullsisë dhe uljes së lindshmërisë, duke balancuar prirjen për reduktim të orëve të punës dhe duke lehtësuar presionet inflacionare, edhe pse pagat nuk kanë ndjekur ritmin e çmimeve.
Ajo pranoi se rritja e partive të ekstremit të djathtë po ushtron presion politik për kufizimin e emigracionit, siç po ndodh në Gjermani dhe Itali. “Emigracioni mund të jetë zgjidhje për mungesën e fuqisë punëtore në një Europë që po plaket, por zhvillimet politike mund ta frenojnë këtë,” paralajmëroi ajo.
Në mbyllje, Lagarde theksoi se Europa nuk duhet të vetëkënaqet nga tregu i punës aktualisht i fortë, pasi rreziqet demografike, reagimet politike dhe ndryshimet në mënyrën e të punuarit mbeten kërcënime serioze për të ardhmen ekonomike të kontinentit.