PRESHEVË , 1 nëntor 2026 /Albania Express News/- Në prag të festave të Nëntorit, monumenti simbolik “PRESHEVA” ka marrë një pamje të re festive dhe domethënëse, duke u shndërruar në një homazh kushtuar historisë, identitetit dhe figurave të shquara të kombit shqiptar.
Nën moton “NëntorLugine”, monumenti është zbukuruar me portretet e personaliteteve që kanë lënë gjurmë të rëndësishme në historinë kombëtare, duke përcjellë një mesazh të fortë atdhedashurie, kujtese historike dhe krenarie kombëtare.
Çdo shkronjë e emrit “PRESHEVA” përfaqëson një figurë të njohur të historisë shqiptare:
- P – Gjergj Kastrioti Skënderbeu, heroi kombëtar i shqiptarëve.
- R – Abdyl Frashëri, një nga ideologët e Rilindjes Kombëtare.
- E – Ismail Qemali, arkitekti i Pavarësisë së Shqipërisë.
- S – Idriz Seferi, luftëtar dhe figurë e shquar e qëndresës kombëtare.
- H – Hasan Prishtina, veprimtar i çështjes kombëtare shqiptare.
- E – Parashqevi Qiriazi, personalitet i arsimit dhe emancipimit kombëtar.
- A – Ibrahim Kelmendi, figurë e angazhimit kombëtar shqiptar.
Një element i veçantë i këtij koncepti është zemra e kuqe, e vendosur në vend të shkronjës “V”, e cila mban shqiponjën dykrenare dhe mbishkrimin “Nëntor Lugine”. Ky simbol i jep monumentit një dimension emocional dhe festiv, duke ndërthurur dashurinë për atdheun me simbolikën e flamurit kombëtar.
Përmes kësaj pamjeje të re, Presheva përcjell një mesazh që shkon përtej dekorimit festiv: kujtesa historike, figura e heronjve dhe personaliteteve kombëtare mbeten pjesë e pandashme e identitetit shqiptar.
Në prag të 28 dhe 29 Nëntorit, monumenti “PRESHEVA” shndërrohet kështu në një pikë simbolike të festimeve, duke sjellë në vëmendje historinë, sakrificat dhe kontributin e brezave për çështjen kombëtare.
Historia na bashkon, flamuri na identifikon, ndërsa kujtesa kombëtare na përcjell ndër breza!
