FRANCË ,14 gusht 2026/Albania Express News/-Historia e Eridan Skanës është një nga ato rrëfime të emigrantëve shqiptarë që dëshmojnë se vështirësitë e fillimit mund të kthehen në një histori të jashtëzakonshme suksesi.
Eridani mbërriti në Besançon të Francës në moshën vetëm 17-vjeçare. I ri, larg vendlindjes dhe pa ditur gjuhën frënge, ai u përball me një realitet krejtësisht të ri dhe me sfidat e integrimit në një vend të huaj.
Por 25 vite më vonë, jeta e tij kishte marrë një tjetër drejtim.
Nga një emigrant shqiptar që sapo kishte nisur jetën në Francë, Eridan Skana u shndërrua në sipërmarrës dhe sot qëndron në krye të tre fabrikave të specializuara në prodhimin e sinjalistikës rrugore.
Një prej kompanive që ai drejton, BFC Signaux, ka shënuar një rritje të ndjeshme në aktivitetin e saj. Brenda vetëm tre vitesh, kompania ka dyfishuar xhiron, duke arritur në rreth 12 milionë euro në vit.
Por suksesi i sipërmarrjes nuk është ndalur këtu. Rreth 12 milionë euro janë investuar në ndërtimin e një fabrike të re prej 7 mijë metrash katrorë në Chemaudin, pranë Besançonit.
Impianti i ri është projektuar për të ofruar mijëra variante të sinjalistikës rrugore për klientët në të gjithë Francën dhe ka krijuar vende pune për dhjetëra persona.
Aktiviteti i kompanisë së drejtuar nga sipërmarrësi shqiptar është shtrirë edhe në projekte të rëndësishme infrastrukturore në Francë. Ndër to përfshihen edhe punime të lidhura me sinjalistikën për projektin e lidhjes inteligjente autostradale mes Parisit dhe Normandisë.
Rrugëtimi i Eridan Skanës është një shembull i qartë i mënyrës se si këmbëngulja, puna dhe aftësia për t’u përshtatur mund të ndryshojnë rrënjësisht fatin e një emigranti.
Ai u largua nga Shqipëria vetëm 17 vjeç, pa ditur asnjë fjalë frëngjisht. Një çerek shekulli më pas, shqiptari që dikur nisi gjithçka nga e para në Besançon, është në drejtimin e tre fabrikave dhe menaxhon një aktivitet që gjeneron miliona euro në vit.