ELBASAN, 28 tetor 2026 /Albania Express News/-AF Elbasani triumfon 2-1 me dy gola në minutat e fundit, ndërsa vendimi i VAR-it për golin e Nikajt shkakton polemika. Partizani zhytet edhe më shumë në krizën e rezultateve.
Një fund dramatik, emocione të forta dhe polemika në “Elbasan Arena”! AF Elbasani ka përmbysur Partizanin me rezultatin 2-1, duke siguruar tri pikë të rëndësishme në një sfidë që u vendos në minutat e fundit të takimit.
Partizani e nisi më mirë ndeshjen dhe kaloi në avantazh në minutën e 16-të. Pas një goditjeje dënimi të harkuar në zonë, Joviçiç u shkëput mirë dhe me kokë mposhti portierin Aleksovski, duke i dhënë epërsinë skuadrës së kuqe.
Miqtë arritën ta ruanin avantazhin për pjesën më të madhe të takimit, pavarësisht përpjekjeve të vendasve për të rikthyer baraspeshën. AF Elbasani rriti presionin në pjesën e dytë, ndërsa Partizani pati mundësi për të dyfishuar rezultatin, por nuk arriti t’i shfrytëzonte rastet.
Minutat e fundit sollën përmbysjen e madhe. Në minutën e 82-të, Mazari goditi nga jashtë zonës dhe, pas devijimit të Pasagiçit, topi përfundoi në rrjetë për rezultatin 1-1.
Kur dukej se ndeshja do të mbyllej në barazim, Nikaj shënoi golin e dytë për verdheblutë në minutën e 88-të, pas një pasimi mbrapa të Markut. Goli u anulua fillimisht për pozicion jashtë loje, por pas verifikimit me VAR, ku u shqyrtua edhe një faull i pretenduar ndaj Qirkos, kryesori Çelaj vendosi ta quante të rregullt.
Vendimi shkaktoi polemika, ndërsa AF Elbasani shpërtheu në festë për një fitore të madhe përballë tifozëve të tij.
Tri pikë për AF Elbasanin, alarm i kuq për Partizanin!
Kjo fitore i jep një shtysë të rëndësishme skuadrës verdheblu, ndërsa për Partizanin situata bëhet edhe më shqetësuese. Të kuqtë pësojnë një tjetër humbje të dhimbshme dhe mbeten në vendin e fundit të renditjes, duke thelluar krizën e rezultateve.
Një përmbysje që do të mbahet mend në Elbasan, por edhe një mbrëmje e shoqëruar me diskutime për vendimet e arbitrimit.