PRRENJAS ,02 gusht 2026/Albania Express News/-Mjeku i ri nga Prrenjasi, Besjan Karriqi, ka reaguar ashpër ndaj propozimit për shkrirjen e Bashkisë së Prrenjasit dhe bashkimin e saj me Bashkinë e Librazhdit, duke e cilësuar këtë proces si një vendim të padrejtë, me pasoja të rënda për identitetin, përfaqësimin dhe të ardhmen e qytetit.
Në fjalën e mbajtur gjatë protestës së organizuar kundër reformës së re territoriale, Karriqi u shpreh se ishte para qytetarëve jo me gëzim, por me “keqardhje të thellë dhe revoltë” për atë që, sipas tij, po i ndodh Prrenjasit.
Ai akuzoi drejtuesit politikë për mungesë koherence, duke kujtuar se në vitin 2015, kreu i Grupit Parlamentar të Partisë Socialiste, Taulant Balla, ishte shprehur publikisht se kishte ndërhyrë për të ruajtur Prrenjasin si bashki më vete. Sipas Karriqit, qëndrimi i sotëm për shkrirjen e saj bie në kundërshtim me premtimet dhe angazhimet e atëhershme ndaj banorëve.
Në deklaratën e tij, mjeku i ri ngriti edhe pyetje për mungesën e reagimit nga deputetët që përfaqësojnë zonën, Olsi Komici dhe Bora Muzhaqi, duke thënë se ata kanë heshtur përballë një çështjeje që prek drejtpërdrejt interesat e qytetarëve të Prrenjasit.
Mjeku Karriqi theksoi se kundërshtimi i tij nuk lidhet me interesat e administratës apo me vendet e punës në bashki, por me faktin se, sipas tij, pas shkrirjes së bashkisë, Prrenjasi do të humbasë strukturat vendimmarrëse dhe shumicën e shërbimeve administrative, të cilat do të transferohen në Librazhd.
Ai argumentoi se kjo reformë nuk duhet të justifikohet me mungesën e efikasitetit të administratës lokale, duke theksuar se përgjegjësia duhet të bjerë mbi drejtuesit që kanë dështuar dhe jo mbi vetë institucionin e Bashkisë së Prrenjasit.
Në fjalimin e tij, Karriqi kritikoi edhe argumentet teknike të përdorura për reformën, duke deklaruar se vendimmarrja për organizimin territorial nuk mund të mbështetet vetëm mbi koeficientë apo formula matematikore, pasi, sipas tij, duhet të merren në konsideratë historia, kultura, trashëgimia, lidhjet mes komuniteteve dhe realiteti gjeografik.
Ai hodhi gjithashtu akuza se reforma territoriale ka prapavijë politike, duke pretenduar se synon centralizimin e pushtetit dhe vështirësimin e garës për partitë opozitare dhe kandidatët e pavarur në zgjedhjet vendore.
Gjatë fjalës së tij, Karriqi solli në vëmendje edhe atë që e cilësoi si një histori të gjatë të dobësimit të institucioneve në Prrenjas. Ai përmendi transformimin e spitalit në qendër shëndetësore, problemet në sistemin arsimor dhe transferimin e burimeve natyrore jashtë qytetit, duke e konsideruar shkrirjen e bashkisë si vazhdim të këtij procesi.
Një pjesë e deklaratës së tij iu kushtua edhe një replike ndaj pedagogut Rezart Prifti, të cilin e akuzoi për ofendim të banorëve të Prrenjasit, duke theksuar se komuniteti nuk duhet të përballet me gjuhë fyese apo nënçmuese.
Në përfundim të fjalimit, Karriqi u bëri thirrje qytetarëve që të mos e shohin këtë debat si një çështje të zakonshme politike, por si një betejë për identitetin dhe të ardhmen e qytetit. Ai kërkoi zgjerimin e protestës dhe angazhimin e të gjithë qytetarëve, përfshirë edhe mbështetësit e Partisë Socialiste, duke argumentuar se ruajtja e Bashkisë së Prrenjasit është një interes që tejkalon bindjet politike dhe lidhet me dinjitetin, institucionet dhe perspektivën e brezave të ardhshëm.
