PRRENJAS,6 maj 2026/Albania Express News/Një operacion i mirëorganizuar antidrogë, i koduar “Rrethinat”, ka çuar në goditjen e një rasti të shpërndarjes së lëndëve narkotike në zonën e Prrenjasit, duke përfunduar me arrestimin e dy shtetasve dhe sekuestrimin e dozave të kokainës, parave dhe pajisjeve që përdoreshin për përgatitjen e saj për treg.
Specialistët për Hetimin e Narkotikëve, në bashkëpunim me Forcën e Posaçme Operacionale dhe nën drejtimin e Prokurorisë së Elbasanit, finalizuan operacionin pas një pune të gjatë operative, hetimesh dhe kontrollesh në terren, me fokus goditjen e veprimtarive kriminale në fushën e narkotikëve.
Në kuadër të këtij operacioni, u vu në pranga shtetasi Gj. K., 32 vjeç, banues në Prrenjas, i cili dyshohet se në lokalin që administronte ndante në doza lëndën narkotike kokainë, me qëllim shitjen tek klientët. Gjatë kontrollit në ambientet e lokalit, shërbimet e policisë zbuluan dhe sekuestruan 76 doza dhe sasi të tjera të dyshuara kokainë, të përgatitura për treg.
Po ashtu, në cilësinë e provës materiale u sekuestruan 3 peshore elektronike që përdoreshin për ndarjen e lëndës narkotike, 3 telefona celularë si dhe shuma monetare prej 48 100 lekësh dhe 450 eurosh, të dyshuara si të përfituara nga aktiviteti i paligjshëm.
Në pranga ra edhe shtetasi K. R., 29 vjeç, i cili u kap në ambientet e lokalit dhe dyshohet se kishte dijeni për veprimtarinë kriminale, por nuk e kishte kallëzuar atë pranë organeve ligjzbatuese.
Policia bën me dije se materialet procedurale i janë referuar Prokurorisë së Elbasanit për vijimin e hetimeve dhe dokumentimin e plotë të këtij aktiviteti kriminal, ndërsa operacionet kundër shpërndarjes së narkotikëve vijojnë në të gjithë qarkun.