ELBASAN,15 maj 2026/Albania Express News/Emërimi i ri në krye të Institucionit të Ekzekutimit të Veprave Penale në Bradashesh vjen në një moment kur sistemi penitenciar në vend po kalon një fazë riorganizimi dhe forcimi të standardeve të sigurisë dhe administrimit. Në këtë kuadër, është prezantuar zyrtarisht drejtori i ri i IEVP Bradashesh, z. Markiz Sallufi, i cili do të marrë drejtimin e një prej institucioneve më të rëndësishme penitenciare në qarkun e Elbasanit.
Prezantoimi i tij u bë këtë të premte në mesditë nga Drejtori i Përgjithshëm i Burgjeve, Adriatik Kupi, i cili gjatë takimit me stafin drejtues dhe administratën e institucionit vlerësoi rëndësinë e forcimit të standardeve të punës dhe sigurisë në sistemin e burgjeve. Ai i uroi suksese drejtorit të sapoemëruar dhe kërkoi që puna në IEVP Bradashesh të ngjitet në nivele edhe më cilësore, duke garantuar profesionalizëm, disiplinë dhe efikasitet në menaxhimin e institucionit.
Z. Markiz Sallufi vjen në këtë detyrë pas një eksperience të gjatë në administratë dhe sektorë me përgjegjësi të lartë. Deri më tani ai ka mbajtur postin e Drejtorit të Tensionit të Lartë në Elbasan, ndërsa më herët ka qenë pjesë e administratës së Bashkisë Peqin, ku ka ushtruar funksione të ndryshme drejtuese dhe administrative. Përvoja e tij në menaxhim dhe administrim konsiderohet një avantazh i rëndësishëm për drejtimin e institucionit penitenciar në Bradashesh.
Burime pranë Drejtorisë së Përgjithshme të Burgjeve bëjnë me dije se këto lëvizje në drejtimin e disa Institucioneve të Ekzekutimit të Veprave Penale janë pjesë e një strategjie më të gjerë për rritjen e sigurisë, përmirësimin e menaxhimit dhe forcimin e kontrollit në sistemin penitenciar shqiptar. Fokus i veçantë do të jetë rritja e përgjegjshmërisë institucionale, garantimi i standardeve më të larta në trajtimin dhe administrimin e të dënuarve, si dhe përmirësimi i kushteve të funksionimit të institucioneve.
IEVP Bradashesh konsiderohet një institucion me rëndësi të veçantë në sistemin penitenciar, për shkak të kapaciteteve dhe rolit që ka në administrimin e të dënuarve. Për këtë arsye, emërimi i drejtuesve me eksperiencë shihet si një hap i rëndësishëm për të garantuar stabilitet, siguri dhe funksionim më efikas të këtij institucioni.
Me marrjen e detyrës së re, pritshmëritë janë që drejtori i ri të sjellë një frymë të re menaxhimi, duke kontribuar në forcimin e disiplinës, rritjen e standardeve profesionale dhe përmirësimin e mëtejshëm të performancës së institucionit në përputhje me objektivat e Drejtorisë së Përgjithshme të Burgjeve.