TIRANË , 22 gusht 2026/Albania Express News/-Laçi dhe AF Elbasani e kanë nisur sezonin e ri të Kategorisë Superiore me nga një pikë, pasi sfida e javës së parë, e zhvilluar në Kurbin, përfundoi në barazim 1-1. Një gol spektakolar në minutat e fundit i mohoi skuadrës elbasanase fitoren, ndërsa Laçi reagoi pas disavantazhit dhe arriti të shmangte humbjen.
AF Elbasani e nisi më mirë takimin dhe arriti të kalonte në avantazh në minutën e 56-të. Boriçi u pengua në zonë pas ndërhyrjes së Kurtit dhe arbitri akordoi 11-metërsh. Nga pika e bardhë u paraqit Rubin Hebaj, i cili nuk gaboi dhe dërgoi topin në rrjetë, duke i dhënë skuadrës së drejtuar nga Ivan Gvozdenoviç avantazhin 0-1.
Pas golit, Laçi shtoi presionin dhe nisi të kërkonte me ngulm barazimin. Kurbinasit patën një mundësi të artë në minutën e 77-të, kur Traore u shfaq rrezikshëm, por gjuajtja e tij u ndal nga portieri në shtyllën e parë.
Presioni i vendasve u konkretizua në minutën e 84-t. Cena realizoi një gol të jashtëzakonshëm nga distanca, duke e dërguar topin në cepin e portës dhe duke vendosur shifrat në 1-1. Goli mori edhe një domethënie të veçantë, pasi Cena ia dedikoi Olsi Myrtës, i cili pësoi një dëmtim të rëndë disa ditë më parë.
Në minutat e fundit, të dyja skuadrat kërkuan golin e fitores. AF Elbasani ishte shumë pranë avantazhit në minutën e 89-të me Deliun, por portieri Guri reagoi në kohë dhe arriti të ndalte gjuajtjen.
Pas pesë minutave shtesë, arbitri sinjalizoi përfundimin e takimit, me Laçin dhe AF Elbasanin që ndanë nga një pikë.
Barazimi lë një shije të hidhur për AF Elbasanin, që ishte pranë fitores pasi kryesoi deri në minutat e fundit. Nga ana tjetër, Laçi mund të vlerësojë reagimin në pjesën e dytë dhe golin spektakolar të Cenës, që i siguroi një pikë në startin e rikthimit në elitën e futbollit shqiptar.
Kategoria Superiore – Java 1
Laçi 1-1 AF Elbasani
Shënues: Cena 84’ / Hebaj 56’ (pen.)
