TIRANË, 7 maj 2026/Albania Express News/ Komisioneri Shtetëror i Zgjedhjeve shqyrtoi sot rezultatet e verifikimit të Prokurorit të Përgjithshëm për Tonin Marinaj, kryetar i bashkisë së Malësisë së Madhe.
KSHZ konstatoi se nuk përfshihet në kushtet e ndalimit për të ushtruar funksionin publik të kryetarit dhe vendosi vazhdimin e mandatit të Tonin Marinaj si kryetar i bashkisë Malësi e Madhe.
Në korrik të vitit 2024, grupi parlamentar i Partisë Demokratike iu drejtua me një kërkesë zyrtare Prokurorit të Përgjithshëm për verifikimin, sipas ligjit të dekriminalizimit, të kryetarit të Bashkisë së Malësisë së Madhe, Tonin Marinaj. Sipas Partisë Demokratike, Marinaj akuzohet nga Prokuroria e Antimafias Italiane si drejtues i një organizate kriminale të trafikut ndërkombëtar të drogës.
Gjithashtu, Komisioneri Shtetëror i Zgjedhjeve shqyrtoi kërkesat e pajisjen me fletë tip për mbledhjen e nënshkrimeve për zhvillimin e referendumeve të përgjithshme për shfuqizimin e ligjit “Për paketën e maleve” dhe shfuqizimin e ligjit “Për investimet strategjike në Republikën e Shqipërisë”.
Të dy kërkesat janë bërë nga Grupi Nismëtar për mbledhjen e nënshkrimeve për Referendum, i përbërë nga 12 anëtarë: Adriatik Lapaj, Dorina Prethi, Elton Laska, Edona Haklaj, Agustella Thoma, z. Alfred Matoshi, Alban Afmeti, Erjon Selmani, Sajmire Hoda, Albert Shkalla, Melanika Lleshi, Erjon Bacaj.
Në përfundim të shqyrtimit të kërkesave, Komisioneri vendosi miratimin e fletës tip për mbledhjen e nënshkrimeve për zhvillimin e referendumit të përgjithshëm për shfuqizimin e ligjit “Për paketën e maleve” dhe fletës tip për mbledhjen e nënshkrimeve për zhvillimin e referendumit të përgjithshëm për shfuqizimin e ligjit “Për investimet strategjike në Republikën e Shqipërisë”.