Java Kulturore Kineze, Koncerti “Melodies Along the Silk Road” nesër në Teatrin “Skampa”

Elbasani mirëpret një mbrëmje të veçantë artistike në kuadër të Javës Kulturore Kineze. Më 23 shtator, në orën 19:00, skena e Teatrit “Skampa” do të gjallërohet nga koncerti madhështor “Melodies Along the Silk Road”, i cili sjell për publikun elbasanas një përzgjedhje të veprave vokale dhe instrumentale të muzikës tradicionale kineze.
Koncerti do të interpretohet nga artistë të shquar kinezë, të cilët kanë ardhur enkas për këtë aktivitet kulturor, duke ofruar një udhëtim muzikor përgjatë “Rrugës së Mëndafshit”. Publiku do të ketë mundësinë të shijojë ndërthurjen e tingujve magjikë dhe traditës mijëravjeçare të kulturës kineze, në një përvojë artistike unike.
Hyrja është e lirë dhe të gjithë qytetarët janë të ftuar të bëhen pjesë e kësaj mbrëmjeje të paharrueshme kulturore.