VLORË,3 maj 2026/Albania Express News/Në zemër të krahinës së Gorrishtit, një vend që mbart histori, sakrifica dhe krenari brezash, sot u shënua një nga ngjarjet më domethënëse të viteve të fundit. Nën drejtimin e Kryetarit të Shoqatës “Zëri i Gorrishtit”, Ardit Zotaj, u jetësua nisma me moton kuptimplotë “Një Pemë, një Jetë”, duke sjellë jo vetëm gjelbërim, por edhe një frymë të re shprese dhe bashkimi për komunitetin.
Ky aksion simbolik dhe konkret njëkohësisht kulmoi me mbjelljen e 100 pemëve në zonë ,një akt që shkon përtej një nisme mjedisore. Çdo pemë e mbjellë përfaqëson një histori familjeje, një rrënjë që lidhet fort me tokën dhe një premtim të gjallë për të ardhmen.
Në krye të kësaj lëvizjeje që po transformon Gorrishtin qëndron Ardit Zotaj, i cili me vizion dhe përkushtim ka ndërmarrë hapa konkretë për zhvillimin e zonës. Një ndër arritjet më të rëndësishme është edhe shtrimi i rrugës së Gorrishtit me çakëll, një investim i munguar për më shumë se katër dekada, që sot po rikthen besimin se ndryshimi është i mundur kur dikush merr përgjegjësi për vendlindjen e tij.
Kjo ditë e veçantë u pasurua edhe me rehabilitimin e dy hapësirave me rëndësi të madhe për komunitetin:
Sheshi në Haderaj, në vendin simbolik “Varri i Mirë”, një hapësirë me vlera shpirtërore dhe historike.
Sheshi në fshatin Rexhepaj, i cili pritet të shndërrohet në epiqendrën e një prej traditave më të bukura të zonës, “Takimi i Brezave” ,një festë identiteti që bashkon këngën, vallen dhe kujtesën kolektive.
Në këtë aktivitet me vlera të forta bashkimi dhe miqësie, morën pjesë edhe figura të njohura, ndër ta Kryetari i fshatit Kaninë dhe Kryetari i Shoqatës së Aviatorëve Vlorë, Bareq Sadiraj, i cili mbolli simbolikisht pemën e miqësisë mes krahinave, duke përcjellë një mesazh të fuqishëm uniteti.
Gjithashtu, pjesë e kësaj dite ishte edhe gazetarja dhe moderatorja e emisionit “Autokton” në News24, e cila prej vitesh promovon kulturën dhe traditën shqiptare. Pema e mbjellë prej saj u kthye në simbol të dashurisë për atdheun dhe përgjegjësisë ndaj rrënjëve.
Në përmbyllje të aktivitetit, Ardit Zotaj falënderoi me emocion të pranishmit për mbështetjen, duke theksuar se kjo është vetëm një nismë që sapo ka nisur. Çdo familje mbolli pemën e saj, si një shenjë e vazhdimësisë dhe e lidhjes së fortë me vendlindjen.
Sot, Gorrishti nuk mbolli vetëm pemë – mbolli kujtesë, bashkim dhe shpresë.
Një mesazh i qartë për brezin e ri: ta duan vendin e tyre jo vetëm me fjalë, por me vepra.
“Një Pemë, një Jetë” tashmë është realitet. Dhe ky është vetëm fillimi i një rruge të re për Gorrishtin.
