TIRANË ,03 gusht 2026/Albania Express News/-Dinamo ka mësuar kundërshtarin e mundshëm në fazën play-off të UEFA Conference League, nëse arrin të kalojë me sukses pengesën e Audës në raundin aktual.
Shorti ka rezervuar një përballje të vështirë për skuadrën e Ilir Dajës, e cila në rast kualifikimi do të përballet me humbësin e çiftit Pafos-Salzburg, dy skuadra me përvojë dhe nivel të lartë në arenën europiane.
Në letër, cilido prej këtyre kundërshtarëve do të ishte një sfidë shumë e fortë për ekipin kryeqytetas.
Pafos zhvilloi një sezon mbresëlënës në kualifikueset europiane vitin e kaluar, ku mori pjesë në UEFA Champions League, duke konfirmuar rritjen e futbollit qipriot në skenën ndërkombëtare.
Nga ana tjetër, Salzburg është një emër i njohur në futbollin europian. Klubi austriak ka qenë pjesëmarrës i rregullt në arenën europiane gjatë viteve të fundit.
Megjithatë, përpara se të mendojë për play-off-in, Dinamo duhet të përqendrohet te përballja me Audën. Kalimi i skuadrës letoneze do të ishte një tjetër hap i rëndësishëm për ekipin e Ilir Dajës, i cili ka treguar karakter dhe organizim në rrugëtimin europian të këtij sezoni.
Nëse arrin të sigurojë kualifikimin, Dinamo do të luajë për herë të dytë radhazi në play off-et e Conference League dhe do të ketë mundësinë të masë forcat me një kundërshtar të nivelit të lartë.