Elbasani po përgatitet të kthehet në një nga kryeqendrat e sportit në rajon, falë organizimit të aktiviteteve të rëndësishme ndërkombëtare që pritet të zhvillohen në qytet.
Në këtë kuadër, sot në Drejtorinë e Klubit Shumësportësh Elbasan u zhvillua një takim zyrtar mirëseardhjeje me përfaqësuesit e Federatës së Ping Pongut të Ballkanit dhe Federatës Shqiptare të Ping Pongut.
Të pranishëm në këtë takim ishin Krenar Dila, President i Federatës Shqiptare të Ping Pongut; Dušan Stevanović, President i MK BTTU; Milorad Trpkovski, Sekretar i Përgjithshëm i BTTU; Tonin Binishi, Sekretar i Federatës Shqiptare të Ping Pongut; si dhe Mariota Luto, Drejtoreshë Operacionale e Federatës.
Në takim morën pjesë edhe përfaqësues të institucioneve vendore dhe emergjencave civile, përfshirë Spitalin Rajonal Elbasan, Shërbimin Zjarrfikës, Policinë Vendore Elbasan dhe Policinë Bashkiake Elbasan.
Gjatë diskutimeve u trajtua në detaje plani i masave dhe koordinimi institucional për organizimin sa më të suksesshëm të Ballkaniadës së Ping Pongut, e cila do të zhvillohet në Elbasan gjatë muajit qershor.
Pas përfundimit të mbledhjes, delegacioni u prit nga Kryetari i Bashkisë Elbasan, Gledian Llatja, ku u firmosën kontratat e bashkëpunimit për realizimin e këtij aktiviteti ndërkombëtar.
Të gjitha institucionet pjesëmarrëse shprehën gatishmërinë e plotë për bashkëpunim dhe angazhim maksimal në funksion të mbarëvajtjes së aktivitetit.
