Eksportet e grupit të mineraleve dhe lëndëve djegëse kanë shënuar një rritje të ndjeshme gjatë 8-mujorit të këtij viti. Sipas të dhënave më të fundit nga Instituti i Statistikave (INSTAT), ato arritën në 75,7 miliardë lekë, nga 55,2 miliardë lekë të regjistruara në të njëjtën periudhë të vitit 2024.
Rritja vjetore përllogaritet në 37,3%, duke e kthyer këtë grup në një ndër kontribuesit kryesorë të tregtisë së jashtme të vendit.
Ndër destinacionet kryesore, Kosova zë vendin e parë, me një vlerë prej 34,7 miliardë lekësh në eksportet e mineraleve dhe lëndëve djegëse gjatë periudhës janar-gusht.
Megjithatë, ekspertët theksojnë se vlera e shtuar e krijuar nga këto eksporte mbetet ende e ulët. Arsyeja lidhet me faktin se ekonomia shqiptare nuk funksionon në një cikël të mbyllur: mineralet kryesisht nxirren dhe eksportohen në gjendje të papërpunuar, pa kaluar në hallkat e përpunimit industrial brenda vendit.