Greqia po përjeton një nga skandalet më të mëdha politike dhe institucionale të dekadës, tashmë i quajtur nga mediat ndërkombëtare si “Watergate-i grek”. Hetimet kanë zbuluar se dhjetëra zyrtarë të lartë, ministra, gjyqtarë, gazetarë dhe ushtarakë janë përgjuar përmes softuerit të paligjshëm spiun Predator, ndërkohë që në disa raste përgjimet janë kryer paralelisht edhe nga Shërbimi Informativ Kombëtar (EYP).
Skandali shpërtheu në vitin 2022, pas denoncimit të Nikos Androulakis, aktualisht kryetar i PASOK, i cili u informua se telefoni i tij ishte komprometuar nga një mesazh i infektuar. Përgjimet me Predator, të shpërndarë nga kompania izraelite Intellexa me bazë në Athinë, kanë prekur të paktën 87 persona, sipas Autoritetit Grek për Mbrojtjen e të Dhënave Personale.
Dorëheqjet e kreut të EYP dhe të këshilltarit kryesor të kryeministrit nuk kanë mjaftuar për të zbutur akuzat, ndërsa opozita flet për një mbulim të së vërtetës nga ekzekutivi. Deri më tani, asnjë zyrtar i qeverisë nuk është përballur me akuza penale, ndërkohë që çështja gjyqësore për dy izraelitë dhe dy grekë pritet të shqyrtohet nga një gjyqtar i shkallës së ulët.