LIBRAZHD,07 gusht 2026 / Albania Express News/-Klubi i futbollit Sopoti ka bërë të ditur rinovimin e kontratës me një prej lojtarëve më të rëndësishëm të repartit difensiv. Mbrojtësi Sodiq Atanda do të vazhdojë të jetë pjesë e skuadrës librazhdase edhe për sezonin e ri, duke vijuar bashkëpunimin me klubin që e konsideron një vlerë të shtuar për objektivat e tij.
Përmes një njoftimi zyrtar, KF Sopoti ka vlerësuar kontributin e Atandës, duke theksuar se lojtari është përshtatur më së miri me kampionatin shqiptar dhe ka fituar një rol të rëndësishëm në formacionin e ekipit.
“Klubi i Futboll Sopoti ka kënaqësinë të njoftojë rinovimin e kontratës dhe vazhdimin e bashkëpunimit me një nga lojtarët më të rëndësishëm në repartin e mbrojtjes për ekipin tonë. I natyralizuar më së miri me kampionatin shqiptar, Sodiq Atanda do të vazhdojë të jetë pa asnjë diskutim një vlerë e shtuar për objektivat tanë për këtë sezon”, thuhet në njoftimin e klubit.
Me këtë lëvizje, Sopoti siguron shërbimet e një futbollisti me eksperiencë, i cili pritet të luajë një rol të rëndësishëm në sezonin e ardhshëm. Rinovimi i Atandës është pjesë e strategjisë së klubit për të ruajtur boshtin e skuadrës dhe për të ndërtuar një ekip sa më konkurrues.
Tifozët bardhejeshilë presin që mbrojtësi të vijojë paraqitjet e tij pozitive dhe të ndihmojë Sopotit në arritjen e objektivave të vendosura për sezonin e ri.