ROMË ,22 korrik 2026/Albania Express News/-Dy nxënës me origjinë shqiptare kanë arritur një sukses të jashtëzakonshëm në një nga kompeticionet më të rëndësishme ndërkombëtare të dijes, duke u shpallur nënkampionë bote në Finalet Botërore të Olimpiadës Ndërkombëtare STEM, të zhvilluara në Romë.
Mes mijëra nxënësve nga vende të ndryshme të botës, në podium u ngjitën Alper Gurler, 10 vjeç, me origjinë shqiptare nga nëna e tij, dhe Junus Aziri, nxënës nga Dibra e Maqedonisë së Veriut. Rezultatet e tyre në fushën e matematikës sollën vlerësim ndërkombëtar dhe një tjetër dëshmi të potencialit të jashtëzakonshëm të të rinjve shqiptarë në arenën globale.
Alper Gurler, talenti i matematikës që mban krenar flamurin kuqezi
Alper Gurler është prej vitesh një nga talentet më premtues në matematikë. Në moshë shumë të vogël ai ka arritur rezultate të shumta në gara kombëtare dhe ndërkombëtare, duke fituar dhjetëra medalje dhe vlerësime.
Vetëm këtë vit, ai u shpall Nënkampion Bote në Matematikë për grupmoshën e tij, duke konfirmuar aftësitë e rralla në zgjidhjen e problemeve logjike dhe matematikore.
Më herët, Alperi kishte fituar edhe medaljen e argjendtë në një kompeticion ndërkombëtar të zhvilluar në Singapor, ndërsa në një tjetër garë globale me rreth 79 mijë pjesëmarrës u veçua si nxënësi i vetëm që arriti të zgjidhte saktë të gjitha pyetjet e testit.
Edhe pse në garat ndërkombëtare përfaqëson Turqinë, familja e tij tregon se Alperi e ruan me krenari identitetin shqiptar të trashëguar nga nëna e tij. Në aktivitetet ku merr pjesë, ai shfaq shpesh edhe flamurin kuqezi, duke e konsideruar një pjesë të rëndësishme të identitetit të tij.
Junus Aziri, dibrani që promovoi kulturën shqiptare në skenën botërore
Një tjetër sukses i madh erdhi nga Dibra. Junus Aziri, nxënës i Shkollës Fillore “Said Najdeni” në Dibër, u shpall gjithashtu Nënkampion Bote në Matematikë për klasat e pesta.
Përveç arritjes së tij shkencore, Junusi tërhoqi vëmendjen gjatë ceremonisë së ndarjes së çmimeve edhe për mënyrën se si promovoi kulturën shqiptare. Në skenën ndërkombëtare ai shpalosi një qilim tradicional me motive dibrane, duke përcjellë një simbol të trashëgimisë kulturore shqiptare para pjesëmarrësve nga e gjithë bota.
Ky gjest u prit me vlerësim, pasi përmes suksesit në shkencë dhe prezantimit të kulturës, Junusi bëri që emri i Dibrës dhe i shqiptarëve të dëgjohej në një aktivitet me pjesëmarrje globale.
Një sukses që nderon talentin shqiptar
Arritjet e Alper Gurler dhe Junus Azirit janë një tjetër dëshmi se të rinjtë me origjinë shqiptare po shfaqin rezultate të jashtëzakonshme në fusha si matematika, shkenca dhe teknologjia.
Suksesi i tyre në Olimpiadën Ndërkombëtare STEM në Romë përfaqëson jo vetëm një triumf personal, por edhe një motiv krenarie për familjet, komunitetet dhe të gjithë shqiptarët, të cilët po shohin gjithnjë e më shumë talente të rinj të spikasin në skenat më prestigjioze të botës.