TIRANË, 27 prill 2026 /Albania Express News/ Kryetari i Partisë Demokratike, Sali Berisha, zhvilloi sot një takim në selinë blu me Christian Forneck, këshilltar për politikën e jashtme dhe të sigurisë pranë grupit parlamentar CDU/CSU në Bundestagun Gjerman.
Berisha vlerësoi mbështetjen e vazhdueshme të zyrtarëve të Bundestagut ndaj Partisë Demokratike, si në periudha në opozitë ashtu edhe në qeveri. Ai theksoi se gjatë takimit u diskutua gjerësisht mbi zhvillimet politike në Shqipëri dhe forcimin e bashkëpunimit mes palëve.
Kreu i PD-së gjithashtu bëri me dije se informoi zyrtarin e Bundestagut në lidhje me deformin sipas tij të procesit zgjedhor.
“Zyrtarët e Bundestagut janë miq të shkëlqyer të cilët i kanë dhënë një ndihmë të çmuar në opozitë dhe në qeveri, në kohëra të mira dhe në kohëra të vështira, Partisë Demokratike. Diskutuam gjerësisht për këtë bashkëpunim dhe e njoha mikun e çmuar me të gjitha zhvillimet në Shqipëri. Me shndërrimin e procesit zgjedhor në farsë elektorale nga Edi Rama, në përqendrimin e të gjitha pushteteve në duart e një njeriu”, tha Berisha.
Berisha nënvizoi se procesi i integrimit të Shqipërisë në Bashkimi Evropian duhet të jetë i bazuar në meritë. Sipas tij, vetëm një proces i tillë i shërben interesave të qytetarëve shqiptarë dhe vetë BE-së.
“Ramë dakord që të intensifikojmë bashkëpunimin në interesin më të mirë të procesit të integrimit të Shqipërisë në BE, i cili, theksoj edhe njëherë, duhet të jetë një proces i bazuar në meritë, sepse vetëm një proces i bazuar në meritë është interesi absolut i qytetarëve shqiptarë.
“Është interesi absolut më i mirë i qytetarëve të BE. Një Shqipëri, epiqendër operacionale e organizatave kriminale të rajonit, të Evropës dhe të botës, siç cilësohet në disa raporte të Departamentit të Shtetit, është një rrezik real për paqen, sigurinë në Shqipëri, rajon e me gjerë”, tha Berisha.
Berisha theksoi se ekzistojnë të gjitha mundësitë për avancimin e integrimit, por, sipas tij, kjo nuk mund të arrihet nën qeverisjen aktuale.