TIRANË, 16 shtator 2026 /Albania Express News/ – Shkrimtari dhe publicisti Ben Blushi ka reaguar pas vendimit të Dhomave të Specializuara të Kosovës në Hagë ndaj Hashim Thaçit dhe ish-drejtuesve të tjerë të UÇK-së, duke paraqitur një interpretim të tij mbi arsyet që, sipas tij, qëndrojnë pas këtij vendimi.
Në një analizë të gjatë, Blushi e lidh fatin e ish-presidentit të Kosovës me zhvillimet gjeopolitike të viteve të fundit dhe ndryshimet në raportet ndërkombëtare.
“Për fat të keq, isha i bindur se Hashim Thaçi dhe shokët e tij do të dënoheshin. Edhe vetë Hashimi e dinte”, shkruan Blushi, duke iu referuar momentit të shpalljes së vendimit në Hagë.
Sipas tij, Thaçi nuk duhet parë vetëm përmes procesit gjyqësor, por edhe në kontekstin e ndryshimeve të mëdha që kanë ndodhur në politikën ndërkombëtare që nga arrestimi i tij.
Blushi përmend luftën në Ukrainë, konfliktin në Gaza, përplasjet politike në Perëndim dhe ndryshimet në marrëdhëniet mes Evropës dhe Shteteve të Bashkuara.
Në qendër të argumentit të tij qëndron ideja se çështja Thaçi është përdorur si pjesë e një përballjeje më të gjerë ndërkombëtare.
“Hashim Thaçi nuk u dënua si vrasës, por u dënua si politikan”, shkruan Blushi, duke shtuar se, sipas interpretimit të tij, vendimi nuk mund të shkëputet nga zhvillimet politike globale.
Publicisti shkon edhe më tej në analizën e tij, duke pretenduar se institucionet ndërkombëtare të drejtësisë po përdoren nga aktorë të ndryshëm të Perëndimit si një instrument për të mbrojtur rendin liberal.
Ai e lidh këtë tezë edhe me urdhër-arrestet e Gjykatës Penale Ndërkombëtare ndaj presidentit rus Vladimir Putin dhe kryeministrit izraelit Benjamin Netanyahu, duke bërë dallimin mes institucioneve dhe juridiksioneve të ndryshme të sistemit ndërkombëtar të drejtësisë.
Blushi argumenton se Thaçi është “sakrifikuar” për të ruajtur autoritetin e këtij sistemi.
“Nëse Hashimi lirohej, Gjykata dobësohej. Ky është thelbi i këtij vendimi”, shkruan ai.
Në një tjetër pjesë të shkrimit, Blushi e përshkruan Thaçin si një figurë që, sipas tij, është shndërruar nga protagonist i çlirimit dhe i shtetformimit të Kosovës në një “peng” të një përplasjeje më të gjerë ndërkombëtare.
Ai e mbyll analizën me një parashikim politik për të ardhmen e Thaçit:
“Hashimi nuk u dënua për atë që ka bërë, por për atë që mund të bëjë. […] Ai nuk u dënua për dje, por për nesër. Nuk u dënua si vrasës, por si politikan. Dhe si politikan do të lirohet.”
Qëndrimet e mësipërme janë pjesë e interpretimit dhe analizës personale të Ben Blushit mbi vendimin e Hagës. Ato nuk përbëjnë në vetvete konstatime gjyqësore apo fakte të provuara mbi motivet e trupit gjykues.