BELSH ,01 gusht 2026/Albania Express News/-Edhe qytetarët e Belshit iu bashkuan këtë të shtunë valës së protestave kundër projektit të ri të Reformës Administrativo-Territoriale, që parashikon bashkimin e Bashkisë Belsh me Bashkinë Elbasan.
Dhjetëra banorë u mblodhën në protestë, duke shprehur hapur kundërshtimin ndaj ndryshimeve të propozuara në hartën e re territoriale. Me pankarta në duar dhe thirrje në mbrojtje të identitetit të qytetit të tyre, protestuesit kërkuan që Belshi të ruajë statusin e bashkisë dhe të mos përfshihet në një njësi më të madhe administrative.
Një nga pankartat që tërhoqi më shumë vëmendjen mbante mesazhin: “Rilindja e donte Belshin kryeqytet, ju po e asimiloni”, duke reflektuar pakënaqësinë e qytetarëve ndaj asaj që ata e konsiderojnë një zbehje të rolit dhe identitetit të Belshit.
Gjatë protestës, qytetarët kërkuan gjithashtu një qëndrim zyrtar nga drejtuesit e Bashkisë Belsh, duke u bërë thirrje autoriteteve vendore që të mbrojnë interesat e komunitetit dhe të reagojnë publikisht ndaj projektit të reformës.
Sipas protestuesve, bashkimi me Elbasanin do të ndikonte negativisht në përfaqësimin e banorëve, administrimin e shërbimeve dhe zhvillimin e zonës, ndërsa theksuan se çdo ndryshim i hartës territoriale duhet të bëhet në konsultim të gjerë me komunitetin lokal.
Protesta në Belsh vjen pas tubimeve të ngjashme të zhvilluara në bashki të tjera të vendit, ku qytetarët kanë shprehur kundërshtimin ndaj draftit të ri të Reformës Administrativo-Territoriale. Debati mbi riorganizimin e pushtetit vendor vijon të mbetet një nga çështjet më të diskutuara në vend, ndërsa pritet që propozimet për hartën e re të shqyrtohen në vijim nga institucionet përgjegjëse.