Hansi Flick do të rinovojë kontratën me Barcelonën menjëherë pasi skuadra blaugrana të sigurojë përfundimisht titullin kampionë në La Liga. Edhe pse nuk ka një datë konkrete, të dyja palët e kanë të qartë se çfarë duhet bërë; mbylljen përfundimisht marrëveshjen dhe nisjen e punës për të planifikuar sezonin e ardhshëm ku priten ndryshime të rëndësishmë në skuadër.
Trajneri gjerman do të zgjasë kontratën e tij me Barcelonën deri në 2028 dhe tani ajo që pritet është vetëm formalizimi dhe nënshkrimi i saj.
Vazhdimësia e Hansi Flick ka qenë gjithnjë prioritet për Joan Laportan. Presidenti i Barcelonës e ka pasur këtë ide në kokën e tij që në momentin kur trajneri gjerman erdhi në pankinën e blaugranave. Në fakt, Laporta e kërkoi Flick edhe përpara se të caktonte Xavi Hernandez në stolin e Barcelonës, por në atë moment Flick ishte nën kontratë me Federatën Gjermane të Futbollit. Pas largimit të Xavi hernandez, Flick ishte zgjedhja e menjëhershme
Dhe impakti i tij te Barcelona nuk vonoi të shfaqej. Në sezonin e tij të parë me klubin katalanas, Flick fitoi titullin në La Liga me autoritet si dhe Kupën e Mbretit e Superkupës së Spanjës dhe arriti deri në gjysmëfinale të Ligës së Kampioneve. Ky rendiment u shpërblye me rinovimin e kontratës deri në vitin 2027. Besnik i filozofisë së tij, Flick gjithnjë ka qenë me idenë për të ecur vit pas viti, pa impenjime afatgjata.
Në fushatën elektorale për zgjedhjet e 15 marsit, Laporta donte të mbyllte këtë çështje. Pikërisht në atë kohë nisën të hidheshin bazat për një marrëveshje që u mbyll me rizgjedhjen e presidentit. Trajneri Flick nga ana e tij nuk preferoi të nënshkruajë kontratën e re deri në qartësimin e panoramës institucionale.
Tani me Laportën të konfirmuar në postin e presidentit dhe me titullin kampion praktikisht të siguruar, nuk ka më asnjë arsye që të shtyhet më hedhja e firmës në kontratën e re, një proces që do të ndodhë shumë shpejt. Trajneri do të ketë edhe 2 sezone të garantuar dhe opsion edhe për një të tretë. Synimi i Laportës, që e ka shprehur edhe gjatë fushatës është që Flick të drejtojë projektin deri në fundin e mandatit të tij dhe të jetë trajneri i skuadrës kur të përurohet Camp Nou i ri.