PODGORICË, 16 shtator 2026 /Albania Express News/ – Intensifikimi i bashkëpunimit ndërmjet vendeve të Ballkanit Perëndimor në luftën kundër krimit të organizuar është i domosdoshëm, pasi rrjetet kriminale po veprojnë përtej kufijve më shpejt se institucionet që synojnë t’i godasin.
Apeli u bë nga Amer Kapetanović, Sekretar i Përgjithshëm i Këshillit të Bashkëpunimit Rajonal (RCC), gjatë Takimit të Ministrave të Brendshëm të Procesit të Berlinit, i zhvilluar më 15 dhe 16 shtator në Podgoricë.
Duke folur në sesionin për forcimin e qëndrueshmërisë ndaj krimit të organizuar, Kapetanović theksoi se lufta kundër rrjeteve kriminale në Ballkanin Perëndimor nuk lidhet vetëm me sigurinë e rajonit, por edhe me sigurinë e Bashkimit Evropian.
“Çdo dërgesë e ndaluar në rajonin tonë është një dërgesë që nuk do të duhet të ndalet në Vjenë, Berlin, Paris apo Londër. Kjo nuk është vetëm e dobishme për rajonin, por është siguri për të gjithë ne. Kriminelët bashkëpunojnë përtej kufijve tanë pa deklarata të përbashkëta. Le të bashkëpunojmë të paktën po aq shpejt”, deklaroi Kapetanović.
Takimi u zhvillua në Vila Gorica, nën kryesimin e Malit të Zi për Procesin e Berlinit gjatë vitit 2026. Në të morën pjesë përfaqësues të gjashtë vendeve të Ballkanit Perëndimor, Komisionit Evropian dhe partnerëve ndërkombëtarë.
Kapetanović solli në vëmendje edhe perceptimin e qytetarëve për korrupsionin dhe krimin. Sipas të dhënave më të fundit të SecuriMeter të RCC-së, 81% e qytetarëve të anketuar e konsiderojnë korrupsionin të përhapur, ndërsa 72% shprehin shqetësim lidhur me krimin e organizuar.
Në këtë kuadër, Sekretari i Përgjithshëm i RCC-së kërkoi përdorim më efikas të të dhënave dhe provave rajonale për identifikimin e boshllëqeve në siguri. Ai veçoi si pika me rëndësi të veçantë portet, rrjetet e transportit dhe sektorin e logjistikës, të cilat mund të shfrytëzohen nga grupet kriminale.
Një tjetër element i rëndësishëm, sipas Kapetanović, është forcimi i bashkëpunimit ndërmjet policisë, doganave dhe operatorëve logjistikë, krahas rritjes së vëmendjes ndaj sigurisë së personelit, informacionit dhe sistemeve digjitale.
Në fokus të diskutimeve ishte edhe kontrolli i armëve të zjarrit. Kapetanović iu referua përvojës së krijuar përmes Udhërrëfyesit të Ballkanit Perëndimor për Kontrollin e Armëve të Vogla dhe të Lehta dhe bashkëpunimit me SEESAC.
Sesioni u drejtua nga ministri i Punëve të Brendshme të Malit të Zi, Danilo Šaranović, ndërsa diskutimet përfshinë përfaqësues të vendeve të Ballkanit Perëndimor dhe Komisionit Evropian.
Bashkëpunimi rajonal në fushën e sigurisë pritet të vijojë edhe në Konferencën Rajonale të Sigurisë JUMBO, që Këshilli i Bashkëpunimit Rajonal do të organizojë në Tiranë gjatë muajit nëntor.
Konferenca do të trajtojë efektivitetin e mbështetjes për institucionet e sigurisë, boshllëqet që vijojnë të ekzistojnë dhe nevojën për koordinim më të fortë ndërmjet vendeve të rajonit.