Nga Sara Tarko
DIVJAKË ,09 gusht 2026/Albania Express News/-Protesta kundër Reformës Territoriale vijon edhe në ditën e nëntë në Divjakë.
Prej nëntë ditësh, qytetarë të Divjakës vijojnë të shprehin kundërshtimin e tyre ndaj reformës territoriale, duke kërkuar që zëri i komunitetit të dëgjohet dhe shqetësimet e tyre të merren në konsideratë.
Protestuesit kanë vijuar të qëndrojnë të bashkuar, duke përcjellë mesazhin e tyre për ruajtjen e interesit të komunitetit dhe për një ndarje territoriale që, sipas tyre, duhet të marrë në konsideratë nevojat, identitetin dhe zhvillimin e zonës.
Banorët theksojnë se Divjaka mbart pasuri të veçanta si Laguna e Karavastasë dhe Parku Kombëtar, një nga pasuritë më të rëndësishme natyrore në Shqipëri. Sipas tyre, zona ka një potencial të madh zhvillimi turistik, falë plazhit, lagunës dhe biodiversitetit të pasur që tërheq vizitorë vendas dhe të huaj.
Gjithashtu, protestuesit nënvizojnë rëndësinë e bujqësisë si një nga shtyllat kryesore të ekonomisë lokale, duke përmendur tokat pjellore dhe prodhimet bujqësore që mbështesin mijëra familje në zonë dhe jo vetëm. Ata shtojnë se çdo ndryshim territorial duhet të marrë parasysh edhe numrin e banorëve dhe shpërndarjen e popullsisë, e cila sipas tyre e bën Divjakën një njësi me identitet dhe nevoja të veçanta administrative.
Në ditën e nëntë, protesta vijon të shënojë pjesëmarrje dhe të mbajë në vëmendje publike kërkesat e qytetarëve të Divjakës.