KORÇË , 05 gusht 2026 / Albania Express News /-Një aksident i rëndë me pasojë vdekjen e një 27-vjeçari është regjistruar në aksin rrugor Korçë–Maliq, pranë fshatit Vashtmi.
Sipas informacioneve paraprake, një automjet tip “Audi”, që dyshohet se po lëvizte me shpejtësi të lartë, ka goditur nga pas një automjet tjetër. Si pasojë e përplasjes së fortë, mjeti i goditur ka dalë nga rruga, ndërsa drejtuesi i tij, një 27-vjeçar që udhëtonte i vetëm, ka humbur jetën në vendngjarje.
Nga automjeti tip “Audi”, ku ndodheshin katër persona, kanë mbetur të plagosur tre prej tyre. Një i ri po merr ndihmë mjekësore në Spitalin Rajonal të Korçës, ndërsa dy vajza janë transportuar në Spitalin e Pogradecit për trajtim. Drejtuesi i mjetit është shoqëruar nga policia.
Forcat e Policisë ndodhen në vendin e ngjarjes dhe kanë nisur hetimet për të zbardhur rrethanat e plota të aksidentit, si dhe për të përcaktuar përgjegjësitë. Dyshimet e para flasin se shpejtësia e lartë e automjetit tip “Audi” mund të ketë qenë shkaku kryesor i kësaj ngjarjeje tragjike.
